सुबास हुमागाईं, ह्युस्टन – आइसीसी विश्वकप लिग २ को तयारीका लागि अमेरिकाको ह्युस्टनमा रहेको नेपाली राष्ट्रिय टोलीले विहीबार नेपाली अल स्टार्ससँग अभ्यास खेल खेल्दैछ । खेल स्थानीय समय विहान १०:३० बजे (नेपालको राती ९:१५ बजे) सुरु हुनेछ ।

नेपाली टोलीको आइसीसी विश्वकप लिग २ को तयारीका लागि नेपाली अल स्टार्सले विभिन्न संस्थासँग सहकार्य गर्दै एक साता लामो प्रशिक्षण क्याम्प र दुई मैत्रीपर्ण खेल तय गरेको हो । एनआरएनए-एनसीसी यूएसए कप २०२२ अन्तर्गत विहीबार हुने खेलमा नेपाली अल स्टार्सको बलियो टोलीले नेपालविरुद्ध खेल्नेछ । शनिबार स्थानीय ह्युस्टन हरिकेन्सले खेल्नेछ । दुवै खेल ह्युस्टनकै प्रेर भ्यु क्रिकेट कम्प्लेसको मैदानमा हुनेछ ।

पहिलो खेलका लागि नेपालले पहिलो रोजाइकै खेलाडी उतार्ने देखिन्छ । बुधबारको प्रशिक्षणमा दुई खेलाडी अनुपस्थित रहेपछि ती दुवैले विश्राम पाउने देखिन्छ । स्पिनर सागर ढकाल र तीव्र गतिका बलर किशोर महतो सामान्य समस्याका कारण विश्राममा थिए । दुवै खेलाडी टोलीसँग मैदान भने पुग्नेछन् । त्यस्तै नेपालले ओपनर सुनिल धमला र विकेटकिपर विनोद भण्डारीलाई विश्राम दिने देखिन्छ ।

टोलीले ओपनरमा कुशल भुर्तेल र आसिफ शेखकै जोडीलाई निरन्तरता दिने प्रशिक्षक पुबुदु दासानायकेले प्रष्ट पारिसकेका छन् । उनले तेस्रो नम्बरमा पनि देव खनाल नै खेलाउने निर्णय गरेका छन् । जिम्बावेविरुद्ध सिरिजमा देवलाई विश्राम दिइएको र अब उनी नै पहिलो रोजाइमा रहने पक्का देखिन्छ । चौथो नम्बरमा खेलको अवस्था अनुसार रोहित पौडेल र दीपेन्द्रसिंह ऐरीले ब्याटिङ गर्नेछन् ।

छैटौं नम्बरमा आरिफ शेख रहेका छन् । सातौं नम्बरमा मोहमद आदील आलमले खेल्नेछन् । आदील र आरिफ खेलको अवस्था अनुसार तल माथि हुने देखिन्छ । टोलीमा फिनिसरको भूमिका पाएका आदीलबाट नेपालले बलिङको पनि अपेक्षा राखेको छ । खेल हुने मुसा क्रिकेट रंगशालामा स्पिनर प्रभावकारी हुने भएकाले पनि नेपालले दुई विशेषज्ञ तीव्र गतिका बलर खेलाएर दुई स्पिनर उतार्नेछ । यस्तोमा आदील र आरिफको पार्ट टाइम पेस बलिङ काम आउने देखिन्छ ।

त्यसपछि करण केसी र सोमपाल कामी ब्याटिङमा आउनेछन् । सन्दीप लामीछाने र सुशन भारीले नेपालको ब्याटिङ लाइनअप पूरा गर्नेछन् । नेपालले दुई विशेषज्ञ स्पिनर र तेस्रो स्पिनरको रुपमा दीपेन्द्रलाई प्रयोग गर्नेछ । आवश्यक पर्दा देव खनालले पनि एन्ड चेन्ज र पार्ट टाइम विकल्पका रुपमा बलिङ गर्न सक्छन् ।

प्रशिक्षक पुबुदु दासानायकेले खेलअघि पत्रकार सम्मेलनमा बोल्दै टोलीमा धेरै प्रयोग गर्न जरुरि नरहेको बताएका छन् । ‘हामी यहाँ प्रयोग गर्न समय खर्चने छैनौं । घरेलु मैदानमा भएको जिम्बावे सिरिजमा हामीले विकल्प प्रयोग गरेर नै यो टोली तयार पारेका हौं,’ उनले भने, ‘अल स्टार्स सन्तुलित टोली हो र हामीले प्रतियोगिताका लागि राम्रो तयारी पाएका छौं । यसको सदुपयोग गरेर हामी खेलको लागि तयार हुन चाहन्छौं ।’

कप्तान सन्दीप लामिछानेले पनि अल स्टार्ससँग खेल्न पाउनु नेपालको लागि राम्रो तयारी हुने बताए । ‘अल स्टार्सजस्तो स्तरीय टोलीविरुद्ध खेल्नु हाम्रो प्रतियोगिता तयारीका लागि एकदम राम्रो पाटो हो । यहाँको वातावरण हाम्रो लागि निकै फरक छ । तर यहाँ खेलिरहेकाको लागि सामान्य नै छ,’ उनले भने, ‘ हामीले व्यावसायिक खेलाडी भएपछि जस्तोसुकै अवस्थामा पनि आफ्नो प्रदर्शन देखाउनु पर्छ । अभ्यास खेलले हामीलाई मुख्य खेलका लागि राम्रो तयारी दिनेछ ।’

अल स्टार्सका प्रशिक्षक लियाम प्लंकेटले राष्ट्रिय टोलीविरुद्ध खेल्न पाउनु आफ्नो टोलीका लागि राम्रो अवसर रहेको बताए । ‘एमएलसीका खेलाडी सम्मिलित गरेर अल स्टार्सले राम्रो टोली तयार गरेको छ । अर्को महिना प्रतियोगिता खेल्ने तयारीमा रहेका खेलाडीका लागि पनि राष्ट्रिय टोलीको विरुद्ध खेल्नु राम्रो अवसर हो,’ उनले भने । प्लंकेटले टोलीमा स्तरीय खेलाडी रहेकाले नेपाललाई कडा चुनाती पेस गर्ने आशा राखेको बताए ।

भारतको यू-१९ टोलीका पूर्व कप्तान उन्मुक्त चन्द पनि पछिल्लो समय अमेरिकामा छन् । उनले नेपालका लागि प्रतियोगिता अघि यो वातावारणमा अभ्यास गर्न पाउनु राम्रो रहेको बताए । ‘नेपालमा खेल्ने वातावरण भन्दा यहाँ निकै भिन्न छ । मुख्य प्रतियोगिताअघि आफूलाई लय समात्न यस्तो खेल महत्त्वपूर्ण हुन्छ । अमेरिकासँग उनीहरुको मैदानमा खेल्नुअघि यो किसिमको तयारीले टोलीलाई राम्रो गर्छ,’ चन्दले थपे । उनले नेपाली टोलीबारे अल स्टार्सलाई पनि राम्रो जानकारी रहेकाले खेल रोमान्चक हुने अपेक्षा गरे ।

नेपाली टोलीबाट लामो समय खेलेका स्पिनर वसन्त रेग्मी विहीबार अल स्टार्सको जर्सीमा देखिनेछन् । उनले नेपाली टोलीविरुद्ध खेल्दा दुवैलाई फाइदा हुने बताउँछन् । ‘म अमेरिकामा भएपनि राष्ट्रिय टोलीको हिस्सा रहेको मान्दछु । मैले यहाँ पनि नियमित व्यावसायिक क्रिकेट खेलिरहेको नै छु । यहाँ खेल्दा मैले पनि टोलीको राम्रो अभ्यास होस् भने खेल्ने हो, यसले मलाई पनि र नेपाली टिमलाई पनि राम्रो गर्छ,’ उनले भने, ‘आज (बुधबार) टिमसँग प्रशिक्षण गर्दा राम्रो लाग्यो । नेपाली टोलीलाई यहाँको वातावरणसँग भिजेर प्रतियोगिता तयारी गर्न राम्रो अवसर छ ।’

वसन्तले आफू नियमित क्रिकेट खेलिरहेको र उमेरले आफ्नो राष्ट्रिय टोली करिअरलाई कुनै असर नपर्ने बताए । ‘म यहाँ पनि नियमित क्रिकेट खेलिरहेको छु । राष्ट्रिय टोलीमा फर्कन मेरो उमेर पुगिसकेको जस्तो मलाइ लाग्दैन,’ उनले भने, ‘हामीले नेपालको बलियो पक्ष थाहा छ भन्दापनि अल स्टार्समा धेरै राम्रा खेलाडी हुनुहुन्छ । नेपाली टोलीलाई राम्रो अभ्यास हुनेछ । यो खेल जित्ने भन्दापनि दुवै टोलीले राम्रो भन्दा राम्रो अभ्यास हुनेछ भन्ने हाम्रो लक्ष्य हो ।’

नेपाली अल स्टार्सका प्रबन्ध निर्देशक संजय शर्माले टोलीको तयारीका लागि सबै पक्षबाट साथ र सहयोग मिलेर नै प्रशिक्षण र अभ्यास खेल सम्भव भएको बताए । उनले नेपाली क्रिकेटलाई माया गर्ने आफ्नो टोलीले निरन्तर प्रयास गरेको र क्यानको सकारात्मक सहयोगले नै यो सम्भव भएको जानकारी दिए । उनले यो अभ्यास खेलले नेपाललाई प्रतियोगितामा सहयोग गर्नुका साथै भविष्यमा अन्य खेलाडीका लागि सम्भावनाको ढोका खोल्न मदत पुग्ने बताए ।

नेपालको सम्भावित ११ : कुशल भुर्तेल, आसिफ शेख, देव खनाल, रोहित पौडेल, दीपेन्द्रसिंह ऐरी, आरिफ शेख, मोहमद आदील आलम, करण केसी, सोमपाल कामी, सन्दीप लामीछाने र सुशन भारी

बेन्च : विनोद भण्डारी, सुनिल धमला, किशोर महतो, सगर ढकाल

नेपाली अल स्टार्स : आन्द्रिस गस (उपकप्तान), उदय कल, नितिश कुमार, पृथु बास्कोटा (कप्तान), मार्टि केन, गौरव बजाज, हिथ रिचार्ड्स, विपुल शर्मा, अदिल भट्टी, हर्मित सिंह, वसन्त रेग्मी, मोहमद इल्यास

यो पनि :

आइपिएल च्याम्पियन शर्माले नेपालविरुद्ध खेल्दै

कोरी एन्डरसनले नेपालविरुद्ध नखेल्ने