ह्युस्टन, अमेरिका (हाम्रो खेलकुद) – नेपाली क्रिकेट टोलीका अनुभवी स्पिनर वसन्त रेग्मीले नेपाली अल स्टार्सबाट पहिलो एकदिवसिय अभ्यास खेलमा नेपालविरुद्ध कसिलो बलिङ गरेका छन् । अमेरिकाको ह्युस्टनमा रहेको पेरिरी भ्यू क्रिकेट कम्प्लेक्समा टस हारेर पहिला ब्याटिङको निम्तो पाएको नेपालले ३० ओभरमा ४ विकेट गुमाउँदै १ सय ९ बनाएको छ ।

वसन्तले ५ ओभरमा १७ रन खर्चिदै कसिलो बलिङ गरेका छन् । विनोद भण्डारी ४६ बलमा २६ रनमा अविजित छन् । आरिफ शेख ४६ बलमा ३० रनमा खेलेका छन् । पाँचौं विकेटका लागि आरिफ र विनोद भण्डारीले ५१ रनको अर्धशतकीय साझेदारी गर्दै इनिङ अगाडि बढाए ।

ओपनर कुशल भुर्तेल तीव्र गतिका बलर मोहम्मद इलायसको पहिलो ओभरको पहिलो बलमै विकेटकिपर एन्ड्रिज गसबाट आउट भए । आसिफ तेस्रो ओभरको तेस्रो बलमा चोटका कारण रिटायर्ट भए ।

रोहित आदिल भाटीको आठौं ओभरको चौथो बलमा विकेटकिपरबाट क्याच हुँदा नेपाल ३१–२ को अवस्थामा पुगेको थियो । सुनिल धमला आदिल भाटीको बलमा ४ रनमा एलबीडब्लू आउट भए ।

देव खनाल स्पिनर हम्रित सिंहको १९ औं ओभरको तेस्रो बलमा एज लागेर फस्ट स्लिपमा आउट भए । देवले ५६ बलमा २ चौका सहित २० रन जोडे ।