काठमाडौं (हाम्रो खेलकुद) – मलेसियामा आजदेखि सुरु हुने आइसिसी यू–१९ महिला टि२० विश्वकप एसिया क्षेत्रको छनोटमा नेपालले आज कतारसँग खेल्दैछ । खेल नेपाली समय अनुसार बिहान ७ : १५ मा मलेसियाको युकेएम एसडी क्रिकेट ओभल बांगीमा सुरुहुनेछ ।

उपाधिको बलियो दाबेदार नेपाल कतारलाई हराउँदै प्रतियोगितामा सानदार विजयी सुरुवात गर्न चाहन्छ । तुलनात्मक रुपमा कतार कमजोर मानिन्छ । ६ देश सहभागी प्रतियोगितामा नेपाल शीर्ष स्थानमा रहन सके आगमी वर्ष दक्षिण अफ्रिकामा हुने टि२० यू–१९ महिला विश्वकप खेल्न पाउनेछ ।

पहिलो पटक हुन लागेको यू-१९ महिला विश्वकपमा पुग्न नेपाललाई थाईल्यान्डसँगको खेल निर्णायक हुने अनुमान गरिएको छ । पछिल्लो समय महिला सियिनर क्रिकेटमा ठूलो फड्को मारेको थाईल्यान्डको महिला टोलीको उमेर समूह पनि मजबुत रहेको अनुमान गरिएको छ । प्रतियोगितामा नेपाल, युएई, मलेसिया, कतार, भुटान, र थाईल्यान्ड छन् ।

कप्तान कृतिका मरासिनी २०१९ मा चीनमा भएको बि एण्ड आर कपमा सर्वोत्कृष्ट बलर हुन् । उनीसँगै तीव्र गतिकी बलर सुस्मिता भुषाल, शीर्षक्रमकी ब्याटर साना प्रविन र सृष्टि जैसी प्रमुख हतियार हुन् ।

नेपाली यू–१९ महिला टोली :

कृतिका मरासिनी (कप्तान), स्नेहा महरा (उपकप्तान), सृष्टी जैसी, मनिषा उपाध्य, मनिषा रानामगर, एलिसा यादव (विकेटकिपर), साना प्रविन, रञ्जु श्रेष्ठ (विकेटकिपर), आस्मा पुलामी मगर, सनु राजवंशी, किरण कुँवर, अञ्जली विक, अनु कडायत र सुस्मिता भुषाल ।

नेपालको खेल तालिका

जेठ २० (जुन ३ ) – नेपालविरुद्ध कतार

जेठ २१ (जुन ४ ) – नेपालविरुद्ध युएई

जेठ २३ (जुन ६ ) – नेपालविरुद्ध भुटान

जेठ २४ (जुन ७ ) – नेपालविरुद्ध थाईल्यान्ड

जेठ २५ (जुन ९ ) – नेपालविरुद्ध मलेसिया