कह्युस्टन, अमेरिका (हाम्रो खेलकुद) – नेपालका कप्तान सन्दीप लामिछानेले नेपाली अल स्टार्सविरुद्ध सानदार बलिङ गरेका छन् । जितको लागि १ सय ९१ रनको विजयी लक्ष्य पछ्याएको नेपाली अल स्टार्सले १३ ओभरमा ४ विकेट गुमाउँदै ७४ रन बनाएको छ ।

ओपनर एन्ड्रिज गौस ३३ बलमा ९ चौकासहित ४५ रनमा बोल्ड आउट भए । भारतीय मुलका अनुभवी ओपनर उदय कौल २६ बलमा २ चौकासहित १३ रनमा क्याच आउट भए । पहिलो विकेटका लागि कौल र गौसले ८.४ ओभरमा ५५ रनको साझेदारी गर्दै राम्रो सुरुवात दिलाए ।

कप्तान सन्दीप लामिछानेको नवौं ओभरको चौथो बलमा ठूलो सट खेल्नेक्रममा कौल देव खनालबाट क्याच आउट भएका थिए ।
११ औं ओभरको पाँचौं बलमा आक्रामक सुरुवात गरेका गौसलाई सन्दीपले बोल्ड गर्दै नेपाललाई खेलमा फर्किने संकेत देखाए । लगत्तै अर्को बलमा पृथु बाँस्कोटालाई सन्दीपले विकेटकिपर विनोद भण्डारीबाट क्याच गराउँदै गोल्डेन डक पेभेलिएन फर्काए ।

सन्दीपले नितिश कुमारलाई ९ रनमा एलबीडब्लू आउट गर्दै उत्कृष्ट पूनरागमन गराएका छन् । सन्दीपले ४ ओभरमा १८ रन खर्चेर ४ विकेट लिएका छन् ।
त्यसअघि अमेरिकाको ह्युस्टनमा रहेको पेरिरी भ्यू क्रिकेट कम्प्लेक्समा टस हारेर पहिला ब्याटिङको निम्तो पाएको नेपाल ४५.५ ओभरमा १ सय ९० रनमा अल आउट भएको थियो ।

नेपालका आरिफ शेखले ७४ बलमा ५ चौकासहित ६४ रनमा अविजित रहे । आरिफले ६६ बलमा अर्धशतक पूरा गरेका थिए । करण केसीले १७ बलमा २ छक्का र १ चौकासहित कुल २१ रन जोडे ।