एजेन्सी – मध्यक्रमका ब्याटर ब्रेन्डन किंगको उत्कृष्ट ब्याटिङमा वेस्टइन्डिजले दोस्रो ओडिआई खेलमा नेदरल्यान्ड्सलाई ५ विकेटले पराजित गरेको छ । योसँगै आइसिसी विश्वकप सुपर लिगको तीन ओडिआई खेलको सिरिज भ्रमण टोली वेस्टइन्डिजले एक खेल अगावै २–० ले जितेको छ ।

जितको लागि २ सय १५ रनको विजयी लक्ष्य पछ्याएको वेस्टइन्डिजले ४५.३ ओभरमा ५ विकेट गुमाउँदै पूरा गर्यो । वेस्टइन्डिजको जितमा किंगले ९० बलमा ९ चौका र ३ छक्कासहित ९१ रनको अविजित इनिङ खेले ।

केसी कार्टी ६६ बलमा २ चौका र १ छक्कासहित ४३ रनमा अविजित रहे । एक समय ९९–५ को खराब अवस्थामा पुगेको वेस्टइन्डिजलाई किंगर र कार्टीले छैटौं विकेटका लागि १ सय १८ रनको अविजित शतकीय साझेदारीका साथ जित पक्का गराए । ओपनर शाई होप १८, नक्रुमाह बोनर १५ र निकोलस पुरन १० रनमा आउट भए । नेदरल्यान्ड्सका बास डी लिडेले २ विकेट लिए ।

त्यसअघि टस जितेर पहिला ब्याटिङ थालेको नेदरल्यान्ड्स ४८.३ ओभरमा २ सय १४ रनमा अल आउट भयो । नेदरल्यान्ड्सका स्कर्ट एडवार्ड्सले ८९ बलमा १ चौकासहित सर्वाधिक ६८ रन बनाए । म्याक्स ओडाउडले ७८ बलमा ३ चौका र १ छक्कासहित ५१ रनमा आउट भए । विक्रमजित सिंहले ५८ बलमा ५ चौका र १ छक्कासहित ४६ रनमा आउट भए ।

नेदरल्यान्ड्सले बलिङ र ब्याटिङ दुबैमा सानदार सुरुवात गरेपनि त्यसलाई निरन्तरता दिन नसक्दा वेस्टइन्डिजलाई स्तब्ध पार्नबाट चुकेको हो । ओपनर विक्रमजित र म्याक्स ओडाउडले पहिलो विकेटका लागि २०.३ ओभरमा १ सय १ रनको उत्कृष्ट शतकीय साझेदारी गर्दै विशाल योगफलको सम्भावना देखाएका थिए । तर शीर्ष तीन बाहेक अन्य ब्याटरले दोहोरो अंकमा रन बनाउन सकेनन् ।

वेस्टइन्डिजका अकिल हुसैनले १० ओभरमा ३९ रन खर्चेर ४ विकेट लिए । अल्जारी जोशेफले २ विकेट लिए । पहिलो खेलमा वेस्टइन्डिज ७ विकेटले विजयी भएको थियो । तेस्रो तथा अन्तिम खेल शनिबार हुनेछ ।