काठमाडौं (हाम्रो खेलकुद) – नेपाल क्रिकेट संघ (क्यान) ले मलेसियामा दुई सातापछि हुने एसिसी वुमन्स टि२० च्याम्पियनसिप क्रिकेट प्रतियोगिताको लागि १९ सदस्य टोली बन्द प्रशिक्षणमा बोलाएको छ । मलेसियामा जुन १७ देखि सुरु हुने प्रतियोगिताको लागि नेपालले १९ खेलाडीलाई प्रशिक्षणमा बोलाएको हो ।

लामो समय समयपछि नेपालले तीव्र गतिकी बलर रेखा रावललाई प्रशिक्षणमा बोलाएको छ । नेपाल एपिएफबाट घरेलु क्रिकेट खेल्ने रेखाले लगातार उच्च प्रदर्शन गर्दै आएकी छिन् । ईश्वरी विष्ट र ममता चौधरीलाई पनि प्रशिक्षणमा बोलाएको छ ।

पहिलो पटक प्रशिक्षणमा परेकी मनिषाले गण्डकी प्रदेशबाट घरेलु क्रिकेट खेल्ने गर्दछिन् । चैतमा गण्डकीले यू–१९ राष्ट्रिय प्रतियोगिता जित्दा उनी टोलीको कप्तान थिइन् । एसिसी वुमन्स टि२० च्याम्पियनसिपमा नेपाल समूह बी मा छ । नेपालसँगै हङकङ, कुवेत, भुटान र बहराईन छन् ।

समूह ए मा युएई, मलेसिया, ओमान, कतार र सिंगापुर छन् । केहि साताअघि सिनियर टोलीबाट युगान्डाविरुद्ध डेब्यू गर्दै सानदार प्रदर्शन गरेकी हिरन्मई राय भने टोलीमा छैनिन् ।

बन्द प्रशिक्षणमा बोलाएको नेपालको टोली :

रुविना क्षेत्री, इन्दु बर्मा, सीता रानामगर, ज्योति पाण्डे, काजोल श्रेष्ठ, कविता कुँवर, अप्सरी बेगम, कविता जोशी, डली भट्ट, सबनम राई, सरिता मगर, रोमा थापा, संगिता राई, अश्मिना कर्माचार्य, मनिषा उपाध्य, विन्दु रावल, ममता चौधरी, रेखा रावल र ईश्वरी विष्ट ।