ह्युस्टन (हाम्रो खेलकुद) – नेपालले आइसिसी विश्वकप लिग २ मा ओमानको प्रमुख विकेट लिएको छ । ह्युस्टनस्थित मुसा क्रिकेट स्टेडियममा टस जितेर पहिला ब्याटिङ रोजेको ओमानले ७ ओभरमा २ विकेट गुमाउँदै ३१ रन बनाएको छ । ओमानका शोएब खान २९ बलमा २ चौकासहित १८ रन र जिशान मकसुद १ रनमा अविजित छन् ।

तीव्र गतिका बलर करण केसीले ओपनर कश्याप प्रजापतिलाई एलबीडब्लू आउट गर्दै इनिङको पहिलो बलमै नेपाललाई सफलता दिलाएका थिए ।

करणले नै ओमानका प्रमुख ब्याटर जतिन्दर सिंहलाई ११ रनमा एलबीडब्लू आउट गर्दै नेपाललाई प्रमुख सफलता दिलाएका हुन् । जतिन्दर ओमानका प्रमुख ब्याटर हुन् । उनी क्रिजमा टिक्नु नेपालको लागि घातक सावित हुन सक्थ्यो ।

नेपाल १२ खेलमा ६ मा जित र ६ मा हारका साथ छैटौं स्थानमा छ । ओमान ३२ खेलमा १९ मा जित र १२ मा हारका साथ शीर्षस्थानमा छ । नेपाललाई शीर्ष तीन स्थानमा रहँदै आगमी वर्ष हुने एकदिवसिय विश्वकप छनोट खेल्न जित्नै पर्ने दबाब छ ।

नेपाल र ओमानबीच ओडिआईमा चार खेल भएको छ । जसमा ओमान तीन र नेपाल एक खेलमा विजयी भएका छन् ।

सुवास खकुरेल, सुनिल धमला, देव खनाल, दीपेन्द्रसिंह ऐरी, रोहित पौडेल, आरिफ शेख, विनोद भण्डारी (विकेटकिपर), सोमपाल कामी, करण केसी, सन्दीप लामिछाने (कप्तान) र सुशान भारी ।