ह्युस्टन, अमेरिका (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत आज घरेलु टोली अमेरिकासँग खेल्दैछ । खेल बेलुका ९ : १५ मा ह्युस्टनस्थित मुसा क्रिकेट स्टेडियममा सुरुहुनेछ ।

यस त्रिकोणात्मक सिरिजमा नेपाल पहिलो र अमेरिका लगातार दोस्रो जितको सोचमा छ । अमेरिकाले ओमानलाई ३ सय २३ रन प्रहार गर्दै १ सय १४ रनको सानदार जित हात पारेको थियो । ओमानले प्रस्तुत गरेको २ सय १२ रनको विजयी लक्ष्य पछ्याउनेक्रममा नेपाल १ सय ९८ रनमा अल आउट भएको थियो ।

पछिल्लो खेलमा नेपाल १३ रनले पराजित भएको हुँदा आज टोलीमा एक परिवर्तन गर्ने सम्भावना छ । प्रमुख खेलाडी घाइते हुँदा टोलीमा परिवर्तन नगर्ने सम्भावना पनि देखिन्छ । ओपनर सुवास खकुरेल ३ र सुनिल धमला १२ रनमा आउट भएका थिए । धमला उक्त रन बनाउन ३८ बल खेलेका थिए । आजको खेलमा कुशल भुर्तेल फिट भएमा सुवासलाई नेपालले बेन्चमा राख्ने सम्भावना छ ।

तर कुशल फिट नहुँदा भने सुवासलाई नै निरन्तरता दिनेछ । धमलालाई भने नेपालले निरन्तरता दिनेछ । किनभने धमलाले एकतर्फबाट विकेट जानबाट बचाउँदै अर्को ब्याटरलाई सहज वातावरण बनाउन सक्छन् । तर धमलाले स्कोरबोर्ड र आफ्नो स्ट्राइक रेटमा भने ध्यान दिनुपर्छ ।

नेपालको तेस्रो नम्बरमा देव खनाल, चौथो नम्बरमा दीपेन्द्रसिंह ऐरी र पाँचौं नम्बरमा रोहित पौडेललाई मैदान उतार्नेछ । यी तीन ब्याटरको प्रदर्शन निकै महत्वपूर्ण हुनेछ । पछिल्लो खेलमा देव खनालले ५३ बलमा ५ चौकासहित ३४ रन जोडेका थिए । देव ठूलो इनिङको सम्भावना राख्छन् । रोहित र दीपेन्द्र नेपालका प्रमुख ब्याटर हुन् । यी तीन ब्याटरले तल्लोक्रम र फिनिसरलाई विना दबाब खेल्ने वातावरण बनाइदिनु पर्छ ।

छैटौं नम्बरमा आरिफ शेखले निरन्तरता पाउनेछन् । आरिफले पछिल्लो खेलमा सर्वाधिक ६६ रन बनाएका थिए । पछिल्लो खेलमा ४६ बलमा १४ रन बनाएका विकेटकिपर विनोद भण्डारीलाई नै नेपालले निरन्तरता दिने सम्भावना छ । सोमपाल कामी, करण केसी र सन्दीप लामिछाने पहिलो रोजाईका बलर हुन् । करणले ओमानविरुद्ध पाँच विकेट लिएको हुँदा उच्च मनोबल हुनेछ ।

स्पिनर सुशान भारी विकल्पमा आदिल अन्सारी र किशोर महतो हुनेछन् । आदिललाई खेलाउँदा एक बलरको अभाव हुने देखिन्छ । आदिल विष्फोटक ब्याटर हुन् । तर आदिललाई खेलाउँदा नेपालसँग तीन प्रमुख बलर हुनेछन् । अर्कोतर्फ आदिल ओमानविरुद्ध अन्तिम १४ को लिष्टमै थिएनन् । जसले गर्दा उनलाई मौका दिने सम्भावना देखिदैन ।

नेपालले किशोरलाई खेलाउदा स्पिन आक्रमण कमजोर हुन जान्छ । अमेरिकाविरुद्ध भारीको रेकर्ड पनि राम्रो छ । त्यसैले भारीलाई नै निरन्तरता दिने सम्भावना छ । ओमानविरुद्ध बायाँ हाते खेलाडीको कारण चार ओभर मात्र गराएको थियो । अमेरिका स्टिभ टेलर बायाँ हाते खेलाडी हुँदा मध्यक्रमको लागि भारीलाई प्रयोग गर्नसक्छ ।

नेपालको सम्भावित प्लेइङ ११ :

सुवास खकुरेल/कुशल भुर्तेल, सुनिल धमला, देव खनाल, दीपेन्द्रसिंह ऐरी, रोहित पौडेल, आरिफ शेख, विनोद भण्डारी (विकेटकिपर), सोमपाल कामी, करण केसी, सन्दीप लामिछाने (कप्तान) र सुशान भारी ।