एजेन्सी – विकेटकिपर हेनरिक क्लासेनको उत्कृष्ट ब्याटिङमा दक्षिण अफ्रिकाले दोस्रो टि२० आई खेलमा भारतलाई ४ विकेटले पराजित गरेको छ । लगातार दुई जितसँगै पाँच टि२० आई सिरिजमा दक्षिण अफ्रिकाले २-० को अग्रता लिएको छ ।

जितको लागि १ सय ४९ रनको मध्यम लक्ष्य दक्षिण अफ्रिकाले १८.२ ओभरमा ६ विकेट गुमाउँदै पूरा गर्यो । दक्षिण अफ्रिका जितमा हेनरिक क्लासेनले ४६ बलमा ७ चौका र ५ छक्कासहित सर्वाधिक ८१ रनको उत्कृष्ट इनिङ खेले । क्लासेनको यो टि२० आई करिअरको उत्कृष्ट प्रदर्शन हो ।

डेविड मिलर १५ बलमा १ चौका र १ छक्कासहित २० रनमा अविजित रहे । एक समय २९-३ को कमजोर सुरुवात गरेको दक्षिण अफ्रिकालाई कप्तान टेम्बा बभुमा र क्लासेनले ४१ बलमा ६४ रनको महत्वपूर्ण साझेदारी गरेका थिए । बभुमा ३० बलमा ४ चौका र १ छक्कासहित ३५ रनमा आउट भए । रास्सी भान डर डुसेन १, रिजा हेन्ड्रिक्स र ड्वेन प्रिटोरियसले ४-४ रन बनाए ।

भारतका भुवनेश्वर कुमारले ४ ओभरमा १३ रन खर्चेर ४ विकेट लिए । युजभेन्द्र चहलले ४ ओभरमा ४९ रन खर्चेर १ विकेट लिए । हर्षल पटेलको नाममा १ विकेट रह्यो ।

त्यसअघि बारबाती स्टेडियम कटकमा टस हारेर पहिला ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १ सय ४८ रन बनाएको थियो । भारतका श्रेयस ऐरले ३५ बलमा २ चौका र २ छक्कासहित सर्वाधिक ४० रनको योगदान दिए । दीनेश कार्तिक २१ बलमा २ चौका र २ छक्कासहित ३० रनमा अविजित रहे । हर्षल पटेल ९ बलमा २ चौकासहित १२ रनमा अविजित रहे ।

सातौं विकेटका लागि कार्तिक र पटेलले १८ बलमा ३६ रनको अविजित साझेदारी गरेका थिए । ओपनर ईशान किशनले २१ बलमा २ चौका र ३ छक्कासहित ३४ रन जोडे । दोस्रो विकेटका लागि किशन र ऐरले ३५ बलमा ४५ रनको साझेदारी गरेका थिए । पहिलो ओभरको पाँचौं बलमा कागिसो रबाडाले ओपनर ऋतुराज गायकवाडलाई केशव महाराजबाट एक रनमा क्याच गराएका थिए ।

एनरिच नोर्कियाको सातौं ओभरको चौथो बलमा डीप स्क्वायर लेगमा रास्सी भान डर डुसेनबाट क्याच गराउँदै किशनलाई पेभेलिएन फर्काए । कप्तान ऋषभ पन्त महाराजको बलमा डीप प्वान्टमा पाँच रनमा रास्सी भान डुसेनबाट क्याच भएपछि भारत समस्यामा परेको थियो । दक्षिण अफ्रिका एनरिच नोर्कियाले ४ ओभरमा ३६ रन खर्चेर २ विकेट लिए ।

पहिलो टि२० खेलमा भारतलाई दक्षिण अफ्रिकाले ७ विकेटले हराएको थियो । जसक्रममा दक्षिण अफ्रिकाले २ सय १२ रनको विशाल लक्ष्य १९.१ ओभरमा पूरा गरेको थियो । तेस्रो खेल मंगलबार विशाखापट्टनमा हुनेछ । चौथो खेल शुक्रबार राजकोट र पाँचौ तथा अन्तिम खेल आइतबार बेंगलोरमा हुनेछ ।