एजेन्सी – तीव्र गतिका बलर हर्षल पटेल र स्पिनर युजभेन्द्र चहलको उत्कृष्ट बलिङमा भारतले तेस्रो टि२० आई खेलमा दक्षिण अफ्रिकालाई ४८ रनले हराउँदै सिरिजमा आफ्नो सम्भावना कायमै राखेको छ । भारत पाँच टि२० खेलको सिरिजमा २(१ ले पछि छ ।

जितको लागि १ सय ८० रनको विजयी लक्ष्य पछ्याएको दक्षिण अफ्रिका १९.१ ओभरमा १ सय ३१ रनमा अल आउट भयो । दक्षिण अफ्रिकाका हेनरिक क्लासेनले २४ बलमा ३ चौका र १ छक्कासहित सर्वाधिक २९ रन बनाए । रिजा हेनड्रिक्सले २० बलमा २ चौकासहित सर्वाधिक २३ रन बनाए । डेविड मिलर ३, ड्वेन प्रिटोरियस २०, केशव महाराज ११ र वेन पार्नेलले २२ रन बनाए ।

भारतका हर्षल पटेलले ३.१ ओभरमा २५ रन खर्चेर ४ विकेट लिए । युजभेन्द्र चहलले ४ ओभरमा २० रन खर्चेर ३ विकेट लिए । भुवनेश्वर कुमार र अक्षर पटेलको नाममा १-१ विकेट रह्यो ।

त्यसअघि विशख्खापट्टममा टस हारेर ब्याटिङको निम्तो पाएको भारतले निर्धारित २० ओभरमा ५ विकेट गुमाउँदै १ सय ७९ रन बनाएको थियो । भारतका ओपनर ऋतुराज गाकवाडले ३५ बलमा ७ चौका र २ छक्कासहित सर्वाधिक ५७ रन बनाए । गायकवाडको यो पहिलो अन्तर्राष्ट्रिय अर्धशतक हो ।

अर्का ओपनर ईशान किशन ३५ बलमा ५ चौका र २ छक्कासहित ५४ रन बनाए । पहिलो विकेटका लागि गायकवाड र किशनले १० ओभरमा ९७ रनको साझेदारी गर्दै उत्कृष्ट सुरुवात दिलाएका थिए । तर गायकवाड केशव महाराजको बलमा कट एण्ड बोल्ड आउट भएपछि भने भारतले लगातार विकेट गुमाएको थियो । हार्दिक पान्ड्या २१ बलमा ४ चौकासहित ३१ रनमा अविजित रहे । श्रेयस ऐर १४, कप्तान ऋषभ पन्त र दीनेश कार्तिक ६–६ रनमा आउट भए ।

दक्षिण अफ्रिका ड्वेन प्रिटोरियसले ४ ओभरमा २९ रन खर्चेर २ विकेट लिए । केशव महाराज, कागिसो रबाडा र तबरेज शाम्सीले १-१ विकेट लिए । दक्षिण पहिलो खेलमा ७ विकेट र दोस्रो खेलमा ४ विकेटले विजयी भएको थियो । चौथो टि२० खेल राजकोटमा शुक्रबार र पाँचौ. तथा अन्तिम खेल बेंगलोरमा आइतबार हुनेछ ।