काठमाडौं (हाम्रो खेलकुद) – नेपाल एसिसी महिला टि२० च्याम्पियनसिपमा हङकङसँग ७ विकेटले पराजित भएको छ । यो हारसँगै नेपाल समूह बी को विजेता बन्दै सेमिफाइनल खेल्ने सम्भावना लगभग सकिएको छ । नेपालले समूह उपविजेताको रुपमा सेमिफाइनल खेल्नेछ ।

जितको लागि १ सय १० रनको विजयी लक्ष्य पछ्याएको हङकङले १५.५ ओभरमा ३ विकेट गुमाउँदै पूरा गर्यो । हङकङको जितमा प्रमुख ब्याटर मारिको हिल ३२ बलमा ९ चौकासहित सर्वाधिक ४५ रनको योगदान दिईन् । बेल्ला पुन १० बलमा २ चौकासहित ९ रनमा आउट भइन् ।

ओपनर पुन र हिलले ३ ओभरमा २८ रन जोड्दै उत्कृष्ट सुरुवात दिलाए । पुन सीता रानामगरको बलमा एबलीडब्लू आउट हुन पुगिन् । दोस्रो विकेटका लागि नताशा मिल्स र हिलले ४३ रनको साझेदारी गर्दै हङकङको जित पक्का गराए ।

मिल्स ३४ बलमा ३ चौकासहित २८ रनमा अविजित रहिन् । कप्तान केरी चान १४ बलमा २ चौकासहित १७ रनमा आउट भइन् । नेपालको संगिता राईले २ ओभरमा २० रन खर्चेर २ विकेट लिइन् । सीता रानामगरले एक विकेट लिइन् ।

त्यसअघि मलेसियाको किनरारा ओभलमा टस जितेर पहिला ब्याटिङ थालेको नेपालले निर्धारित २० ओभरमा ६ विकेट गुमाउँदै १ सय ९ रन बनाएको थियो । नेपालकी कप्तान रुविना क्षेत्री बेलबासेले ३६ बलमा ४ चौकासहित सर्वाधिक ३२ रनमा अविजित रहिन् । ओपनर विन्दु रावल २९ बलमा ३ चौकासहित २३ रनमा आउट भइन् ।

सातौं विकेटका लागि अप्सरी बेगम र रुविनाले ४४ रनको अविजित साझेदारीको गरेका थिए । अप्सरी १६ बलमा २ चौकासहित २२ रनमा अविजित रहिन् । नेपाललाई ओपनर सीता रानामगर र विन्दु रावलले ३.४ ओभरमा १८ रन जोड्दै मध्यम सुरुवात दिलाएका थिए । सीता १० बलमा १ चौकासहित ९ रनमा रन आउट भइन् ।

शीर्षक्रमकी ब्याटर इन्दु बर्मा १० बल खेल्दा खाता नखोली बोल्ड आउट भइन् । इन्दु बेट्टी चानको सातौं ओभरको अन्तिम बलमा बोल्ड भइन् । काजोज श्रेष्ठलाई चानले नै एक रनमा बोल्ड गरिन् । विन्दु रावललाई दशौं ओभरको पाँचौं बलमा मर्याम बिवी एलबीडब्लू आउट गरेकी थिइन् । ममता चौधरी १० बलमा १ चौकासहित ७ रनमा रन आउट भइन् ।

कविता जोशी एलिसा हब्र्बाडको बलमा चार रनमा बोल्ड हुँदा नेपाल १४.५ ओभरमा ६५–६ को कमजोर अवस्थामा पुगेको थियो । हङकङकी बेट्टी चानले ४ ओभरमा १७ रन खर्चेर २ विकेट लिइन् । एलिसा हब्र्बाडले ४ ओभरमा २२ रन खर्चेर १ विकेट लिए । मर्याम बिवीले २ ओभरमा १५ रन खर्चेर १ विकेट लिइन् ।

समूह बी मा रहेको नेपाल ४ खेलमा ६ अंकका साथ दोस्रो स्थानमा छ । नेपालले भुटानलाई ५० रन, कुवेतलाई २५ रन र बहराइनलाई ८ विकेटले पराजित गरेको थियो । नेपाल शीर्षस्थानमा रहँदै सेमिफाइनल खेल्न अन्तिम खेलमा हङकङ कुवेतसँग फराकिलो अन्तरले पराजित हुनुपर्छ ।

हङकङ विजयी हुँदा भने नेपाल समूह बी को उपविजेताको रुपमा सेमिफाइनल खेल्नेछ । फाइनल पुग्ने दुई टोली एसिया कप महिला टि२० क्रिकेट प्रतियोगिता खेल्न पाउने छन् । जहाँ भारत, पाकिस्तान, बंगलादेश, श्रीलंका र थाईल्यान्ड हुनेछन् ।

अंक तालिका

नेपाल ४ खेलमा ६ अंकका साथ समूह बी मा शीर्ष स्थानमा छ । हङकङ ३ खेलमा ६ अंकका साथ शीर्षस्थानमा छ । कुवेत ३ खेलमा ३ अंक जोड्दै तेस्रो स्थानमा छ । बहराइन ३ खेलमा २ मा हारका साथ १ अंक जोड्दै चौथो र भुटान २ खेलमा अंक बिहीन हुँदै पुछारमा छ ।

युएई समूह ए मा ३ खेलमा २ मा जितका साथ ५ अंक जोड्दै शीर्षस्थानमा छ । मलेसिया ३ खेलमा २ मा जित र १ मा हारका साथ दोस्रो स्थानमा छ । कतार ३ खेलमा ४ अंकका साथ तेस्रो स्थानमा छ । सिंगापुर ४ खेलमा २ अंकका साथ चौथो र ओमान ३ खेलमा १ अंकका साथ पुछारमा छ ।

असार १० (जुन २४ ) – सेमिफाइनल

असार ११ जुन २५ ) – फाइनल