काठमाडौं (हाम्रो खेलकुद)– बर्षको अन्तिम महिनामा सुदूरपश्चिमाञ्चलको धनगढीमा सर्वाधिक पुरस्कार राशीको सगरमाथा सिमेन्ट धनगढी प्रिमियर लिग (डिपिएल) क्रिकेट आयोजना हुने भएको छ । धनगढी क्रिकेट एकेडेमी र सुदूरपश्चिमाञ्चल एकेडमी (एसपिए) को संयुक्त आयोजनामा हुने टि ट्वान्टी प्रतियोगिताको विजेताले १५ र दोस्रो हुने टोलीले ७ लाख रुपैयाँ पाउने बुधबार राजधानीमा आयोजित प्रतियोगितामा जानकारी दिइयो । घरेलु क्रिकेटमा यो अलिहे सम्मकै ठूलो धनराशीको पुरस्कार हो ।

धनगढी क्रिकेट क्लबका अध्यक्ष सुवास शाहीले होटल डिभोटी एसपिए कप र सगरमाथा सिमेन्ट धनगढी क्रिकेट लिगलाई मर्ज गरेर नयाँ स्वरुपमा समगरमाथा सिमेन्ट डिपिएल आयोजना गर्न लागिएको बताए । प्रतियोगिता चैत ५ गतेबाट सुरु हुनेछ । प्रतियोगितामा छ टोलीको सहभागिता रहनेछ । देश ६ शहरको नामबाट सहभागी हुने क्लबको नाम पुस २१ गते सार्वजनिक गरिने अध्यक्ष शाहीलेब बताए । सोही दिन टोलीको नाम, मालिक र कप्तानको नाम सार्वजनिक गरिने बताइएको छ ।

अहिले सम्म धनगढी, अत्तरिया, रुपन्देही र काठमाडौंका प्रतियोगितामा भाग लिन तयार भइसकेको जानकारी प्राप्त भएको पनि उक्त अवसरमा जानकारी दिइनेछ । प्रतियोगितामा सहभागी हुन चाहने खेलाडीले धनगढी क्रिकेट एकेडेमीमा नाम दर्ता गराएपनि खेलाडी चयन ‘अक्सन’ राखिने बताइएको छ । दर्ता हुन चाहाने खेलाडीले एक हजार पाँच सय रुपैयाँ शुल्क बुझाउनुपर्नेछ । खेलाडी अक्सन पुस २३ गते राजधानीमा हुनेछ । सहभागि टोलीले ३ विदेशी खेलाडी राख्न पाउने र २ जनासम्म खेलाउन पाउने नियमावली बनाएको छ ।

आयोजकले अक्सनका लागि खेलाडीलाई तीन श्रेणीमा विभाजन गर्दै न्यूनत्तम पारिश्रमिक तोकेको छ । आयोजकले राष्ट्रिय टोलीका खेलाडीका लागि ५० हजार, यू १९ राष्ट्रिय टोलीका सदस्य र पूर्व राष्ट्रिय खेलाडीलाई ३० हजार तथा पूर्व यू १९ र कुनै पनि स्तरको प्रतियोगिता नखेलेका खेलाडीका लागि २० हजार रुपैयाँ अक्सन रकम तोकेको छ । लिग चरणमा सबै टोलीले एकअर्कासँग प्रतिस्पर्धा गरेपछि शीर्ष चार टोलीबीच प्ले अफ हुनेछ । पहिलो र दोस्रो टोलीको विजेता फाइनल पुग्नेछ । त्यसमा पराजित हुने टोलीले तेस्रो र चौथो हुने टोलीको विजेतासँग फाइनल प्रवेशका लागि पुनः प्रतिस्पर्धा गर्नेछ ।

सोही पत्रकार सम्मेलनमा घोराई सिमेन्ट इण्डष्ट्रिजको उत्पादन सगरमाथा सिमेन्टका निर्देशक सञ्जय बंसल र धनगढी क्रिकेट क्लबका अध्यक्ष शाहीबीच मुख्य प्रायोजनका लागि सम्झौता भएको थियो । सम्झौता रकम १५ लाख रुपैयाँ रहेको छ । राष्ट्रिय टोलीका कप्तान पारसले राजधानी बाहिर क्रिकेट हुनुले क्रिकेटको घरेलु संरचनालाई बलियो बनाउने बताए । तेक्वान्दोका कीर्तिमान खेलाडी दीपक विष्टले सुदूरपश्चिमाञ्चल क्रिकेट शहरका रुपमा विकसित हुँदै गएकोमा खुसी व्यक्त गर्दै क्रिकेट विकासमा लागि परेका शाहीको प्रशंसा गरे ।

नेपाल पयर्टन बोर्ड प्रमुख कार्यकारी अधिकृत देशलाई चिनाउन यस्ता टोली महत्वपूर्ण हुने बताए । प्रतियोगिताको सहप्रयोजनमा राईका टुर एण्ड ट्राभल्स, होटल डिभोटि, वेल्स क्याफे, चौधरी बुक डिपो छन् । त्यस्तै प्रतियोगिताको प्रबद्र्धकको रुपमा नेपाल पर्यटन बोर्ड, राष्ट्रिय खेलकुद परिषद, धनगढी उपमहानगरपालिका, होटल ब्यबसायी संघ कैलाली, जिविस कैलाली र क्रिकेट प्लेयर्स एसोसियसन नेपाल (इप्यान) छन् ।