एजेन्सी – घरेलु टोली मलेसियाले एसिसी महिला टि२० च्याम्पियनसिपमा हङकङलाई १२ रनले स्तब्ध पार्दै फाइनलमा स्थान बनाएको छ । योसँगै मलेसिया र युएई फाइनलमा पुग्दै एसिया कपमा स्थान बनाएका छन् ।

जितको लागि ८७ रनको विजयी लक्ष्य पछ्याएको हङकङले निर्धारित ११ ओभरमा ८ विकेट गुमाउँदै ७४ रन बनायो । वर्षाको कारण खेल ११–११ ओभरमा झारिएको थियो । हङकङकी कर्या चानले १० बलमा ३ चौकासहित सर्वाधिक १९ रन बनाइन् । मारिको हिल ९ बलमा १ चौकासहित १२ रनमा आउट भइन् । प्रमुख खेलाडी हिल रन आउट हुनुनै हङकङको हारको कारण बन्यो ।

हङकङले सुरुवाती तीन ओभरमै ३८ रन जोड्दै सहज जितको संकेत दिएको थियो । त्यसपछि ४८ बलमा हङकङले ४९ रन मात्र बनाएपछि एसिया कप खेल्ने अवसर गुमाएको थियो । नताशा मिल्स ८ र यस्मिन दस्वानी १० रनमा आउट भइन् ।

मलेसियाकी सषा अज्मी र निक नुरले २–२ विकेट लिए । त्यसअघि किनरारा एकेडेमी ओभलमा टस हारेर पहिला ब्याटिङ गर्दै निर्धारित ११ ओभरमा ४ विकेट गुमाउँदै ८६ रन बनाएको थियो । मलेसियाकी मास एलिसाले २४ बलमा २ चौका र १ छक्कासहित ३३ रनमा अविजित रहिन् ।

विनिफ्रेड दुराईसिंघमले २१ बलमा ३ चौकासहित सर्वाधिक २६ रन बनाइन् । वान जुलिया र ईशा हुन्टरले १०(१० रन बनाए । हङकङकी मर्याम विबीले दुई विकेट लिइन् ।

पहिलो सेमिफाइनलमा भने युएई समूह विजेताको रुपमा फाइनलमा पुग्यो । किनरारा ओभलमा टस हारेर ब्याटिङ थालेको युएई १९.५ ओभरमा ८१ रनमा अल आउट भएको थियो । युएईकी ईशा ओझाले १५ र कप्तान चया मुघलले १४ रन बनाइन् । नेपालकी अश्मिना कर्माचार्यले ३.५ ओभरमा १० रन खर्चेर ५ विकेट लिइन् । इन्दु बर्माले तीन र सीता रानामगरले दुई विकेट लिए ।

तर वर्षाको कारण दोस्रो इनिङ हुन नसक्दा युएई समूह विजेताको रुपमा फाइनलमा पुगेको हो । युएई समूह ए को विजेता र मलेसिया उपविजेता हुन् । नेपाल समूह बी को उप विजेता र हङकङ समूह विजेता रुपमा सेमिफाइनल खेलेका थिए ।

एसिया कपमा भारत, पाकिस्तान, श्रीलंका, बंगलादेश, थाईल्यान्ड, मलेसिया र युएई हुनेछन् । मलेसिया र युएईबीचको फाइनल शनिबार हुनेछ । समूह चरणका खेलमा मलेसिया युएईसँग ३१ रनले पराजित भएको थियो । हालसम्म चार टि२० आई खेल हुँदा मलेसियाले युएईलाई हराउन सकेको छैन ।