एजेन्सी – विकेटकिपर ऋषभ पन्तले चार दिनको अभ्यास खेलमा लेस्टरशायरबाट भारतविरुद्ध अर्धशतक प्रहार गरेका छन् । दोस्रो दिनको खेल जारी रहँदा लेस्टरशायर दुई रनले पहिलो इनिङमा पछि परेको छ ।

लेस्टरशायर पहिलो इनिङमा ५७ ओभरमा २ सय ४४ रनमा अल आउट भयो । लेस्टरशायरको लागि पन्तले ८७ बलमा १४ चौका र १ छक्कासहित सर्वाधिक ७६ रनमा आउट भए । पन्त रविन्द्र जडेजाको बलमा श्रेयस ऐरबाट क्याच आउट भए ।

लुईस किम्बर ३१, जोय इभिसन २२, ऋषि पटेल र रोमान वाल्कर ३४–३४ रनमा आउट भए । चेतेश्वर पुजारा भने डक आउट भए । भारतका मोहम्मद शामी र रविन्द्र जडेजाले तीन तीन विकेट लिए । मोहम्मद शिराज र शार्दुल ठाकुरले दुई दुई विकेट लिए ।

त्यसअघि ग्रेस रोड लेस्टरमा टस जितेर पहिला ब्याटिङ थालेको भारतले २४६/८ को अवस्थामा इनिङ समाप्तिको घोषणा गरेको थियो । भारतका विकेटकिपर श्रीकर भरतले १ सय ११ बलमा ८ चौका र १ छक्कासहित सर्वाधिक ७० रन बनाए । रोहित शर्मा २५, सुभमन गिल २१, हनुमा विहारी ३, विराट कोहली ३३, श्रेयस ऐर डक, जडेजा १३, शार्दुल ठाकुर ६ र उमेश यादव २३ रनमा आउट भए ।

लेस्टरशायरका २१ वर्षीय तीव्र गतिका बलर रोमान वाल्करले सर्वाधिक पाँच विकेट लिए । विल डेभिसको नाममा दुई विकेट रह्यो । भारतका जस्प्रित बुमराह, पुजारा, पन्त र प्रसिद्ध कृष्णले लेस्टरशायरबाट भारतविरुद्ध अभ्यास खेल खेलेका छन् । गतवर्ष भारत र इंग्ल्यान्डबीचको पाँचौं तथा अन्तिम टेस्ट खेल कोरोना कारण स्थगित भएको थियो । उक्त खेल १ जुलाईदेखि बर्मिङ्घममा सुरुहुनेछ ।

त्यसअघि भारतले इंग्ल्यान्डको चर्चित काउन्ट्री क्लब लेस्टरशायरसँग चार दिनको अभ्यास खेल खेलेको हो । पाँच टेस्टको सिरिजमा भारत २–१ ले अघि छ । उक्त टेस्ट खेलपछि तीन टि२० आई र तीन ओडिआई खेलको सिरिज हुनेछ ।