एजेन्सी – आइसिसी विश्व टेस्ट च्याम्पियनसिपमा भारतले इंग्ल्यान्डसँगको खेलको क्रममा गल्ती गरेपछि त्यसको फाइदा पाकिस्तानलाई पुगेको छ । भारत मंगलबार इंग्ल्यान्डसँग पाँचौं टेस्ट खेलमा ७ विकेटले पराजित भयो । जसक्रममा भारतलाई स्वलो ओभर रेटको कारण दुई प्वाइन्ट घटाएपछि भारत चौथो स्थानमा पुगेको छ ।

भारतलाई जरिवाना लागेपछि पाकिस्तान तेस्रो स्थानमा उक्लिएको छ । भारतले निर्धारित समय भन्दा दुई ओभर ढिला गरेपछि दुई अंक काटिएको हो । आइसिसीको नियम १६.११.२ को अनुसार विश्व टेस्ट च्याम्पियनसिपमा एक ओभर बराबर एक अंक काटिने गर्दछ । त्यसैको कारण काटिएको हो । त्यसको फाइदा पाकिस्तानलाई पुगेको हो । भारतलाई ४० प्रतिशत म्याच फि पनि काटिने भएको छ ।

जरिवानापछि भारत चौथो स्थानमा पुगेको हो । पाकिस्तान तेस्रो स्थानमा उक्लिएको हो । पाकिस्तानक ५२.३८ प्रतिशत अंकका साथ तेस्रो स्थानमा छ । भारत ५२.०८ प्रतिशतका साथ चौथो स्थानमा पुगेको छ । दुई अंक काटिनु अघि भारतकोे प्रतिशत ५३.४७ थियो ।

९ टोली सहभागी प्रतियोगितामा शीर्ष दुई टोली अर्को वर्ष उपाधिको लागि फाइनलमा पुग्नेछन् । अष्ट्रेलिया ७७.७८ प्रतिशतका साथ शीर्ष स्थानमा छ ।

दक्षिण अफ्रिका ७१.४३ प्रतिशतका साथ दोस्रो स्थानमा छ । वेस्टइन्डिज ५० प्रतिशतको साथ पाँचौं, श्रीलंका४७.६२ प्रतिशतका साथ छैटौं र इंग्ल्यान्ड ३३.३३ प्रतिशतका साथ सातौं स्थानमा छ । गत वर्षको च्याम्पियन न्युजिल्यान्ड भने २५.९३ का साथ आठौं र बंगलादेश १३.३३ को साथ पुछारमा छ ।

जितका लागि लागि ३ सय ७८ रनको विजयी लक्ष्य पछ्याएको इंग्ल्यान्डले पाँचौं दिन पहिलो सेसनमा ७६.४ ओभरमा ३ विकेट गुमाउँदै पूरा गयो । योसँगै पाँच टेस्ट खेलको सिरज २-२ को बराबरीमा सकियो । यो इंग्ल्यान्डले टेस्ट क्रिकेटमा पूरा गरेको सर्वाधिक ठूलो योगफल हो । यसअघि इंग्ल्यान्डले २०१९ मा लिड्समा अष्ट्रेलियाविरुद्ध ३ सय ५९ रनको लक्ष्य पूरा गरेको थियो ।

इंग्ल्यान्डका जो रुट १ सय ७३ बलमा १९ चौका र १ छक्का १ सय ४२ रनमा अविजित रहे । २०२१ यता रुटको टेस्टमा ११ औं शतक हो । जोनी बेयरस्टो १ सय ४५ बलमा १५ चौका र १ छक्कासहित १ सय १४ रनमा अविजित रहे । चौथो विकेटका लागि रुट र बेयरस्टोले ३ सय १६ बलमा २ सय ६९ रनको अविजित साझेदारी गर्दै ऐतिहासिक जित पक्का गरेका थिए ।

खेलको सम्पूर्ण जानकारी पाउन यो पढ्नुहोस् : रुट र बेयरस्टोको उत्कृष्ट शतकमा भारतमाथि इंग्ल्यान्डको ऐतिहासिक जित