एजेन्सी – भारतले दोस्रो टि२० आई खेलमा घरेलु टोली इंग्ल्यान्डमाथि ४९ रनको सानदार जित हात पारेको छ । योसँगै भारतले तीन टि२० आई खेलको सिरिज एक खेल अगावै जितेको छ ।

जितको लागि १ सय ७१ रनको मध्यम विजयी लक्ष्य पछ्याएको इंग्ल्यान्ड १७ ओभरमा १ सय २१ रनमा अल आउट भयो । इंग्ल्यान्डका मोईन अलीले २१ बलमा ३ चौका र २ छक्कासहित सर्वाधिक ३५ रन बनाए । डेविड विली २२ बलमा ३ चौका र २ छक्कासहित सर्वाधिक ३३ रनमा अविजित रहे । अन्य कुनैपनि ब्याटरले राम्रो प्रदर्शन गर्न सकेनन् ।

पहिलो ओभरको पहिलो बलमै ओपनर जेसन रोय तीव्र गतिका बलर भुवनेश्वर कुमारको बलमा रोहित शर्माबाट क्याच हुँदै रोयल डक आउट भए । भुवनेश्वर ले नै तेस्रो ओभरको तेस्रो बलमा कप्तान जस बटलरलाई ४ रनमा विकेटकिपर ऋषभ पन्तबाट क्याच गराउँदै इंग्ल्यान्डलाई ११–२ को अवस्थमा पुर्याए ।

जस्प्रित बुमराहले पाँचौं ओभरको पहिलो बलमा इंग्ल्यान्डका आक्रामक ब्याटर लियाम लिभिङस्टोनलाई १५ रनमा बोल्ड गरेपछि भारत खेलमा हाबी बनेको थियो ।

थप १४ रन जोड्दा युवा ब्याटर ह्यारी ब्रुक युजभेन्द्र चहलको बलमा सूर्यकुमार यादवबाट क्याच हुँदै ८ रनमा पेभेलिएन फर्काए । जुन समय इंग्ल्यान्ड ४१–४ को अवस्थामा पुगेको थियो ।

डेविड मलान र साम करन आउट हुँदा इंग्ल्यान्ड १०.२ ओभरमा ६०–६ को दयनीय अवस्थामा पुगेको थियो । मलान २५ बलमा २ चौकासहित १९ रनमा आउट भए ।

भारतका भुवनेश्वर कुमारले ३ ओभरमा १ मेडनसहित १५ रन खर्चेर ३ विकेट लिए । जस्प्रित बुमराहले ३ ओभरमा १ मेडनसहित १० रन खर्चेर २ विकेट लिए । युजभेन्द्र चहलले २ ओभरमा १० रन खर्चेर २ विकेट लिए । हर्षल पटेल र हार्दिक पान्ड्याले एक एक विकेट लिए ।

त्यसअघि बर्मिंघममा टस हारेर ब्याटिङको निम्तो पाएको भारतले निर्धारित २० ओभरमा ८ विकेट गुमाउँदै १ सय ७० रन बनाएको थियो । भारतका रविन्द्र जडेजा २९ बलमा ४ चौकासहित सर्वाधिक ४६ रनमा अविजित रहे । कप्तान रोहित शर्माले २० बलमा ३ चौका र २ छक्कासहित ३१ रन बनाए ।

ओपनर ईशान किशनलाई बेन्चमा राखेपछि भारतले विकेटकिपर ऋषभ पन्तलाई ओपनिङ गराएको थियो । रोहित र पन्तले ४.५ ओभरमा ४९ रनको साझेदारी गर्दै राम्रो सुरुवात दिलाए । तर भारतले त्यो सुरुवातलाई निरन्तरता दिन सकेन । रोहित ग्लीसनको सट बलमा टप एज लागेर विकेटकिपर जस बटलरबाट क्याच आउट भए । त्यसपछि भारतका प्रमुख ब्याटर समालिन सकेनन् ।

३४ वर्षीय ग्लीसनले आफ्नो पहिलो ओभरमै पहिलो अन्तर्राष्ट्रिय विकेटको रुपमा रोहितलाई आउट गरे । ग्लीसनले सातौं ओभरमा विराट कोहली र ऋषभ पन्तको लगातार विकेट लिर्दै खेल इंग्ल्यान्डको पक्षमा फर्काए । सातौं ओभरको पहिलो बलमा विराट कोहली १ रनमा खराब सट खेल्दै डेविड मलानबाट उत्कृष्ट क्याच आउट भए ।

लगातार खराब प्रदर्शनसँगै विश्वकपमा कोहलीको प्रदर्शनमा प्रश्न उठ्न थालेको छ । कोहली आज दीपक हुडाको स्थानमा खेलेका थिए । लगत्तै अर्को बलमा ऋषभ पन्त लेग साइडमा एज लागेर बटलरबाट क्याच भएपछि भारत ६१–३ को अवस्थामा पुगेको थियो । पन्तले १५ बलमा ४ चौका र १ छक्का सहित २६ रन बनाए ।

त्यसपछि हार्दिक पान्ड्या र सूर्य कुमार यादवले भारतलाई आशा देखाएका थिए । तर क्रिस जोर्डनले ११ औं ओभरमा लगातार यी दुई ब्याटरलाई आउट गरेपछि भारतको ठूलो योगफलको सम्भावना सकिएको थियो ।

तेस्रो बलमा साम करनले डीप मिडविकेटमा उत्कृष्ट क्याच लिँदै सूर्यलाई १५ रनमा पेभेलिएन फर्काए । लगत्तै अर्को बलमा पान्ड्या प्वाइन्टमा मलानबाट १२ रनमा क्याच आउट भए । दीनेश कार्तिक १२ र हर्षल पटेल १३ रनमा आउट भए ।

इंग्ल्यान्डका रिचर्ड ग्लीसनले ४ ओभरमा १ मेडनसहित १५ रन खर्चेर तीन स्टार ब्याटरलाई आउट गर्दै सानदार डेब्यू गरे । क्रिस जोर्डनले ४ ओभरमा २७ रन खर्चेर ४ विकेट लिए । पहिलो खेलमा भारत ५० रनले विजयी भएको थियो । तेस्रो खेल आइतबार हुनेछ । त्यसपछि तीन ओडिआई खेलको सिरिज हुनेछ ।