काठमाडौं (हाम्रो खेलकुद) – नेपाल आइसिसी विश्वकप लिग २ त्रिकोणात्मक ओडिआई सिरिजमा घरेलु टोली स्कटल्यान्डसँग ८ विकेटले सहजै पराजित भएको छ । योसँगै स्कटल्यान्ड भ्रमणमा नेपालले एक मात्र जितका साथ फर्किने भएको छ ।

जितको लागि १ सय २९ रनको विजयी लक्ष्य पछ्याएको स्कटल्यान्डले १९ ओभरमा २ विकेट गुमाउँदै पूरा गर्यो । स्कटल्यान्डका ओपनर काइल कोट्जर ५२ बलमा ७ चौकासहित ४४ रनमा अविजित रहे ।

कलुम म्याकलिओडे २९ बलमा १० चौका र ३ छक्कासहित ६४ रनको आक्रामक इनिङ खेल्दै आउट भए । नेपालका सन्दीप लामिछानेले र सोमपाल कामीले १-१ विकेट लिए ।

त्यसअघि टिटवुड ग्लासगोमा टस हारेर पहिला ब्याटिङ गरेको नेपाल ३४.५ ओभरमा १ सय २८ रनमा अल आउट भएको थियो । नेपालका ओपनर आसिफ शेख ५८ बलमा ६ चौकासहित सर्वाधिक ४० रनमा क्याच आउट भए । आसिफ स्पिनर मार्क वाट्टको १९ औं ओभरको तेस्रो बलमा विकेटकिपर म्याथ्यु क्रसबाट क्याच भए । तर अम्पायरको निर्णयमा भने आसिफ सन्तुष्ट थिएनन् । उनले एज नलागेको संकेत दिएका थिए ।

आसिफ आउट हुँदा नेपाल १८.३ ओभरमा ६४–३ को अवस्थामा थियो । थप ६ रन जोेड्न मध्यक्रमका तीन ब्याटर गुमाएपछि नेपाल समस्यामा परेको थियो । ओपनर कुशल भुर्तेल पुन खराब प्रदर्शन गर्दै आउट भए । कुशल स्पिनर मार्क वाट्टको छैटौं ओभरको दोस्रो बलमा १६ बल खेल्दै ३ रनमा क्याच आउट भए ।

देव खनाल गेभिन मेनको बलमा १० रनमा क्याच आउट भए । रोहित पौडेल २० औं ओभरको पाँचौं बलमा फस्ट स्लिपमा कलुम म्याकलेओडबाट १० रनमा क्याच भए । रोहितले १६ बलमा १ चौका प्रहार गरे ।

मार्क वाट्ले नै आरिफ शेखलाई २१ औं ओभरको तेस्रो बलमा कलुमबाट शून्यमा क्याच गराएपछि नेपाल संकटमा परेको थियो । दीपेन्द्र स्पिनर हम्जा ताहिरको बलमा एज लागेर विकेटकिपरबाट ७ रनमा क्याच आउट भए ।

स्कटल्यान्ड भ्रमणमा पहिलो खेल खेलेका विनोद भण्डारी २१ बलमा २ चौकासहित १३ रनमा आउट भए । भण्डारी ताहिरको बलमा प्वाइन्टमा खेल्ने धुनमा क्रिस ग्रिब्सलाई विकेट सुम्पेका थिए । करण केसी गेभिन मेनको बलमा ७ रनमा बोल्ड भए । सन्दीप लामिछाने २७ बलमा ३ चौकासहित २७ रनमा अन्तिम विकेटका रुपमा क्याच आउट भए ।
स्कटल्यान्डका स्पिनर हम्जा ताहिरले ७.५ ओभरमा १ मेडनसहित २६ रन खर्चेर ४ विकेट लिए । मार्क वाट्टले ८ ओभरमा १ मेडनसहित १९ रन खर्चेर ३ विकेट लिए । गेभिन मेनले दुई विकेट लिए ।

नेपाल स्कटल्यान्ड भ्रमणमा तीन खेलमा हार र एक खेलमा विजयी भयो । पहिलो खेलमा स्कटल्यान्डलाई ५ विकेटले हराएको थियो । नामिबियासँग ४० र ६३ रनले पराजित भएको थियो । नेपाल २० खेलमा ८ मा जित र ११ मा हारका साथ १७ अंक जोेड्दै छैटौं स्थानमा पुगेको छ । योसँगै नेपालको शीर्ष तीनमा रहेर सिधैं ग्लोबल एकदिवसिय विश्वकप छनोट खेल्ने अवसर कठिन बनेको छ ।

अंक तालिका

ओमान ३६ खेलमा २१ मा जित र १३ मा हारका साथ ४४ अंक जोड्दै शीर्षस्थानमा छ । स्कटल्यान्ड २४ खेलमा १६ मा जित र ६ मा हारका साथ ३४ अंक जोड्दै दोस्रो स्थानमा छ । युएई २२ खेलमा १२ मा जित र ८ मा हारसहित २६ अंकका साथ तेस्रो स्थानमा छ ।

अमेरिका २४ खेलमा ११ मा जित र १२ मा हारका साथ २२ अंक जोड्दै चौथो स्थानमा छ । नामिबिया १८ खेलमा ९ मा जित र ९ मा हार सहित १८ अंकका साथ पाँचौं स्थानमा छ । नेपाल २० खेलमा ८ मा जित र ११ मा हारका साथ १७ अंक जोड्दै छैटौं स्थानमा छ । पपुवा न्युगिनी २० खेलमा १ मा जित र १९ मा हारका साथ पुछारमा छ ।