काठमाडौं (हाम्रो खेलकुद) – अमेरिकी राष्ट्रिय क्रिकेट टोलीका बलर अली खानले सामाजिक संजाल ट्वीटरमार्फत नेपाली समर्थक सबैभन्दा खराब रहेको प्रतिक्रिया दिएका छन् ।

अमेरिकी पत्रकार पिटर डेला पेनाले एक समर्थकले उनलाई लेखेको व्यक्तिगत संदेशबारे लेखिएको पोस्टमा अली खानले आफ्नो प्रतिक्रिया दिएका हुन् । नाम नखुलेका नेपालका समर्थकले पत्रकार पेनालाई कमेन्ट्री गर्दा नेपालको विपक्षमा बोलेको बताएका थिए । पेनाले आफ्नो भनाइ राखेको पोस्टमा अली खानले पनि नेपालका समर्थक सबैभन्दा खराब रहेको बताएका हुन् ।

गत महिना मात्र नेपालले अमेरिका टुरमा रहँदा अली खानले मैदानमा उपस्थित समर्थकलाई लक्षित गर्दै विभिन्न हाउभाउ देखाएका थिए । फिल्डिङका क्रममा नेपाली समर्थकलाई उत्तेजित पार्ने हर्कत गरेका अली खानले दोस्रो खेल जितेपछि नेपाली समर्थककै अगाडी भाङ्ग्रा नाच देखाएका थिए ।

Nepali fans are the worst ever

— Ali khan (@IamAlikhan23) July 17, 2022

अली खान अमेरिकाले पाएको हालसम्मकै सर्वश्रेष्ठ क्रिकेटरमा गनिन्छन् । उनी आइपिएलमा बिक्ने पहिलो अमेरिकी क्रिकेटर समेत बनेका थिए । उनले अन्य विदेशी लिगमा पनि खेल्दै आएका छन् । पाकिस्तानमा जन्मिएका उनले सन् २०१६ मा अमेरिकाबाट डेब्यु गरेका थिए ।

हाल ३१ वर्ष पुगेका उनी आफ्नो परिवारसँग १८ वर्षको हुँदा अमेरिका आएका थिए । उनी सन् २०१५ मा खुला छनोटबाट आइसीसी अमेरिकाको टोलीमा पर्दै चर्चामा आएका थिए । उनको जीवनकथामा आधारित रहेर पत्रकार पेनाले किताब समेत लेखेका छन् ।

अली गत साता अमेरिकाबाट आइसीसी टि२० विश्वकप छनोट खेल्दा घाइते हुन पुगेका थिए । अमेरिका आफ्नो समूहबाट अघि बढेपनि सेमिफाइनलमा नेदरल्यान्ड्ससँग पराजित हुँदै विश्वकपमा छनोट हुन असफल रहयो । अमेरिका तेस्रो स्थानको खेलमा पनि पिएनजीसँग पराजित भएको थियो ।

अमेरिका सन् २०१९ मा नेपाल भ्रमणमा आउँदा अली टोलीमा थिएनन् । ह्युस्टनमा गत महिना भएको खेलदेखि नै उनको हाउभाउका कारण सामाजिक संजालमा नेपाली समर्थकले अलीमाथि नकारात्मक टिप्पणी गरेका थिए ।