काठमाडौं (हाम्रो खेलकुद)– नेपाली युवा टोली एउटा सुखद नतिजाका साथ श्रीलंकामा जारी एसिसी यू १९ एसिया कपको यात्रा टुंगाउने पक्कै पनि चाहन्छ । त्यसका लागि आज मलेसियाविरुद्ध हुने समूह चरणको अन्तिम खेल जित्नु पर्ने हुन्छ । नेपाल जस्तै मलेसिया पनि सुरुआती दुई खेल हार्दै प्रतियोगितबाट बाहिरिसकेको छ ।
नेपाल र मलेसियाबीचको खेल बिहान नेपाली समय अनुसार सवा १० मा सुरु हुनेछ । जारी प्रतियोगितामा मलेसियाले भन्दा नेपालले राम्रो प्रदर्शन गरिरहेको छ । श्रीलंकासँग २ सय २८ रनको लक्ष्य पछ्याएको नेपाल १ रनको झिनो अन्तरले पराजित भएको थियो । त्यस्तै प्रतियोगिताकै दाबेदार भारतसँग ६ विकेटले हर्दा टोलीले १ सय ७२ रन जोडेको थियो ।
मलेसिया भने भारतसँग २ सय ३५ रन र श्रीलंकासँग ८ विकेटले पराजित भएको थियो । समूह एबाट सेमिफाइनल पुगिसकेका भारत र श्रीलंकाबीच पनि आज प्रतिस्पर्धा हुदैछ । अर्को समूहमा बंगलादेश, पाकिस्तान, अफगानिस्तान र सिंगापुर छन् ।
