काठमाडौं (हाम्रोखेलकुद)- श्रीलंकामा जारी यु-१९ एसिया कपको तेस्रो खेलमा मलेसियाबिरुद्ध नेपाल एक विकेटले बिजयी  भएको छ ।  मलेसियाबिरुद्ध १५४ रनको चुनौती पाएको नेपालले उक्त लक्ष्य पछ्यौदा नेपालले एक विकेट बांकी छँदै जित हात पारेको हो। ९औ विकेटकालागि पवन श्राफ र अनिल शाहले ३९ रनको साझेदारी गर्दा जित सम्भब भएको थियो । 

टस हारेर ब्याटिङ गर्न आएको मलेसियाको लागि भिरान्दिप सिंहले अर्धशतक प्रहार गर्नु बाहेक अरु ब्याटस्म्यानले खासै गतिलो योगदान गर्न सकेनन । मलिफ ११ र हसिफ २१ले मात्र दोहोरो अंक जोड्न सफल भएका थिए ।  मलेसियाले ४४.३ ओभर खेल्दै १५३ रन बनाएको हो । चौथो नम्बरमा ब्याटिङ गर्न आएका भिरान्दिपले ७५रन बनाए । नेपालका लागि आदिल खानले सर्बाधिक ३ विकेट लिए भने सन्दिप र दीपेन्द्रले २ तथा रोहित र उराओले पनि १-१ विकेट लिए । मलेसियाका एक खेलाडिलाई दीपेन्द्रले रन आउट गरेका थिए ।

१५४रनको लक्ष्य सहित ब्याटिङ गर्न उत्रीको नेपालले सुरुवातमै ६ रन मात्र प्रहार गर्दा लगातार दुई विकेट गुमायो । आशिफले १ र आदिलले कुनै रन बनाउन सकेनन । पहिलो नम्बरमा ब्याटिङ गर्न आएका अविनाशले २९ रन, फर्ममा रहेका दीपेन्द्रले २२, अनिल शाहले ३२, रोहितले १२ र पवनले २९ रन प्रहार गरे, अरुकुनै पनि ब्याट्सम्यानले दोहोरो अंक बनाउन सकेनन ।  नेपालले ४४.४ ओभरमा ९ विकेट गुमाउदै लक्ष्य पुरा गरेको थियो ।