एजेन्सी – कप्तान बाबर आजमसहित तीन ब्याटरको अर्धशतकमा पाकिस्तानले दोस्रो ओडिआई खेलमा घरेलु टोली नेदरल्यान्ड्सलाई ७ विकेटले पराजित गरेको छ । योसँगै तीन ओडिआई खेलको सिरिज पाकिस्तानले एक खेल अगावै जितेको छ ।

जितको लागि १ सय ८७ रनको विजयी लक्ष्य पछ्याएको पाकिस्तानले ३३.४ ओभरमा ३ विकेट गुमाउँदै पूरा गर्यो । पाकिस्तानको जितमा मोहम्मद रिजवान ८२ बलमा ६ चौका र १ छक्कासहित सर्वाधिक ६९ रनमा अविजित रहे । सलमान अली अघा ३५ बलमा ५ चौका र २ छक्कासहित ५० रनमा अविजित रहे । उनको पहिलो ओडिआई अर्धशतक हो ।

ओपनर फखर जमान ३ र इमाम उल हक ६ रनमा आउट भए । कप्तान बाबर आजमले ६५ बलमा ७ चौकासहित ५७ रन बनाए । नेदरल्यान्ड्सका भिभियन किंग्माले सर्वाधिक दुई विकेट लिए ।

त्यसअघि टस जितेर पहिला ब्याटिङ थालेको नेदरल्यान्ड्स ४४.१ ओभरमा १ सय ८६ रनमा अल आउट भयो । नेदरल्यान्ड्सका बास डि लिडेले १ सय २० बलमा २ चौका र ३ छक्कासहित सर्वाधिक ८९ रन बनाए । टम कपुरले ७४ बलमा ७ चौका र २ छक्कासहित ६६ रन बनाए ।

सुरुवात ८ रन जोड्न तीन विकेट गुमाउँदै खराब गरेको थियो । तर चौथो विकेटका लागि लिडे र कपुरले १ सय ९ रनको शतकीय साझेदारी गरेका थिए । तर अन्य ब्याटरले भने राम्रो प्रदर्शन गर्न सकेनन् ।

पाकिस्तानका हरिस रौफले ७.१ ओभरमा १६ रन खर्चेर ३ विकेट लिए । मोहम्मद नवाजले १० ओभरमा ४२ रन खर्चेर ३ विकेट लिए । नसिम साहले ६ ओभरमा २७ रन खर्चेर २ विकेट लिए ।

पहिलो खेलमा पाकिस्तान १६ रनले विजयी भएको थियो । तेस्रो तथा अन्तिम खेल आइतबार हुनेछ ।