एजेन्सी – न्युजिल्यान्डले तेस्रो तथा अन्तिम ओडिआई खेलमा घरेलु टोली वेस्टइन्डिजलाई ५ विकेटले हराउँदै सिरिज जितेको छ । न्युजिल्यान्डले पहिलो खेल गुमाएपनि त्यसपछि लगातार दुई खेल जितका साथ सिरिज जितेको हो ।

जितको लागि ३ सय २ रनको विजयी लक्ष्य पछ्याएको न्युजिल्यान्डले ४७.१ ओभरमा ५ विकेट गुमाउँदै पूरा गर्यो । न्युजिल्यान्डको जितमा कप्तान टम लाथमले ७५ बलमा ६ चौकासहित सर्वाधिक ६९ रनको योगदान दिए । जेम्श निसमले ११ बलमा १ चौका र ४ छक्कासहित ३४ रनमा अविजित रहँदै खेल सकाए ।

ओपनर मार्टिन गुप्टिल ६४ बलमा ५ चौका र १ छक्कासहित ५७ रन र फिन एलेन ३ रनमा आउट भएका थिए । चौथो विकेटका लागि डर्याल मिचेल र टम लाथमले १ सय २० रनको शतकीय साझेदारी गर्दै जितको आधार तय गरेका थिए । मिचेल ४९ बलमा ६ चौका र १ छक्कासहित ६३ रनमा आउट भए ।

दोस्रो विकेटका लागि गुप्टिल र कन्वेले ८२ रनको साझेदारी गरेका थिए । कन्वे ६३ बलमा ६ चौकासहित ५६ रनमा आउट भए । वेस्टइन्डिजका जेसन होल्डर र यानिक कारियाहले समान दुई विकेट लिए ।

त्यसअघि बार्बाडोसमा टस हारेर ब्याटिङ थालेको वेस्टइन्डिजले निर्धारित ५० ओभरमा ८ विकेट गुमाउँदै ३ सय १ रन बनाएको थियो । वेस्टइन्डिजका ओपनर काइल मेयर्सले १ सय १० बलमा १२ चौका र ३ छक्कासहित १ सय ५ रनको शतकीय इनिङ खेले । उनको यो ओडिआई करिअरको दोस्रो शतक हो ।

कप्तान निकोलस पुरनले ५५ बलमा ४ चौका र ९ छक्कासहित ९१ रनको विष्फोटक इनिङ खेलेपनि टोलीको हार टार्न सकेनन् । ओपनर शाई होप र काइल मेयर्सले पहिलो विकेटका लागि ३४.५ ओभरमा १ सय ७३ रनको सानदार सुरुवात गरेका थिए । होप १ सय बलमा ३ चौका र १ छक्कासहित ५१ रनमा आउट भए । अन्य ब्याटरले भने राम्रो प्रदर्शन गर्न सकेनन् ।

न्युजिल्यान्डका ट्रेन्ट बोल्टले १० ओभरमा १ मेडनसहित ५३ रन खर्चेर ३ विकेट लिए । मिचेल सान्टनरले दुई, टिम साउथी, लोकी फर्गुसन र जेम्स निसमले एक एक विकेट लिए ।

पहिलो खेलमा न्युजिल्यान्ड ५ विकेटले पराजित हुँदा दोस्रो खेलमा डकवर्थ लेविस पद्धतीको आधारमा ५० रनले विजयी भएको थियो ।