एजेन्सी – भारतले युवा ब्याटर शुभमन गिलको शतकको सहयोगमा तेस्रो ओडिआई खेलमा जिम्बावेलाई १३ रनले हराउँदै क्लिनस्विप गरेको छ ।

जितको लागि २ सय ९० रनको विजयी लक्ष्य पछ्याएको जिम्बावे ४९.३ ओभरमा २ सय ७६ रनमा अल आउट भयो । जिम्बावेका सिकन्दर राजाले ९५ बलमा ९ चौका र ३ छक्कासहित १ सय १५ रनको शतकीय इनिङ खेलेपनि टोलीको हार टार्न सकेनन् । राजाको यो ओडिआई करिअरको पाँचौं शतक हो ।

जिम्बावेका लागि आठौं विकेटका लागि ब्राड इभान्स र राजाले ७७ बलमा १ सय ४ रनको शतकीय साझेदारी गर्दै एक समय जिततर्फ अघि बढाएका थिए । अन्तिम ९ बलमा १५ रन चाहिँएको अवस्थामा राजा क्याच आउट भएपछि जिम्बावेको जित टाढिएको थियो । राजा शार्दुल ठाकुरको ४९ औं ओभरको चौथो बलमा गिलबाट क्याच आउट भए ।

अनुभवी खेलाडी सन विलियम्स ४६ बलमा ७ चौकासहित ४५ रनमा आउट भए । इभान्स ३६ बलमा २ चौकासहित २८ रनमा आउट भए । जिम्बावेका अन्य ब्याटरले भने राम्रो गर्न सकेनन् ।

भारतका आवेश खानले ९.३ ओभरमा १ मेडनसहित ६६ रन खर्चेर ३ विकेट लिए । दीपक चाहर, अक्षर पटेल र कुलदीप यादवले दुई दुई विकेट लिए ।

त्यसअघि हरारे स्पोर्ट्स क्लबमा टस जितेर पहिला ब्याटिङ थालेको भारतले निर्धारित ५० ओभरमा ८ विकेट गुमाउँदै २ सय ८९ रन बनायो । भारतका शुभमन गिलले तेस्रो नम्बरमा ब्याटिङ गर्दै ९७ बलमा १५ चौका र १ छक्कासहित सर्वाधिक १ सय ३० रनको शतकीय इनिङ खेले । गिलको यो सिनियर टोलीबाट पहिलो अन्तर्राष्ट्रिय शतक हो ।

ओपनर शिखर धवन र लोकेश राहुलले पहिलो विकेटका लागि ६३ रनको साझेदारी गरेका थिए । धवन ६८ बलमा ५ चौकासहित ४० रनमा आउट भए । कप्तान राहुल ४६ बलमा १ चौका र १ छक्कासहित ३० रनमा आउट भए ।

ईशान किशनले ६१ बलमा ६ चौकासहित ५० रनमा आउट भए । तेस्रो विकेटका लागि ईशान किशन र गिलले १ सय २७ बलमा १ सय ४० रनको शतकीय साझेदारी गरेका थिए । भारतका अन्य ब्याटरले भने राम्रो प्रदर्शन गर्न सकेनन् । सञ्जु स्यामसन १३ बलमा २ छक्कासहित १५ रनमा आउट भए ।

जिम्बावेका तीव्र गतिका बलर ब्राड इभान्सले १० ओभरमा ५४ रन खर्चेर ५ विकेट लिए । भारत पहिलो खेलमा १० विकेट र दोस्रो खेलमा ५ विकेटले विजयी भएको थियो ।