काठमाडौं (हाम्रो खेलकुद) – नेपालका युवा ओपनर अर्जुन साउदले केन्यासँगको तेस्रो एकदिवसिय अभ्यास खेलमा अर्धशतक प्रहार गरेका छन् ।

जितको लागि २ सय ५६ रनको विजयी लक्ष्य पछ्याएको नेपालले २९ ओभरमा १ विकेट गुमाउँदै १ सय ४३ रन बनाएको छ । नेपालका अर्जुन साउद ८४ बलमा २ चौका र २ छक्कासहित ५२ रनमा अविजित छन् ।

ज्ञानेन्द्र मल्ल ४७ बलमा १ चौकासहित २९ रनमा क्रिजमा छन् । दोस्रो विकेटका लागि ज्ञानेन्द्र र अर्जुनले ७० रनको साझेदारी गरेका छन् ।

ओपनर आसिफ शेख ४३ बलमा ९ चौका र २ छक्कासहित ५६ रनमा आउट भएका छन् । आसिफको पहिलो खेलमा केन्याविरुद्ध १ सय १० रनको शतकीय इनिङ खेलेका थिए । दोस्रो खेलमा भने आसिफलाई नेपालले विश्राम दिएको थियो ।

त्यसअघि जिमखाना क्लब मैदानमा टस जितेर पहिला ब्याटिङ थालेको केन्याले निर्धारित ५० ओभरमा ९ विकेट गुमाउँदै २ सय ५५ रन बनायो । केन्याका तेस्रो नम्बरका ब्याटर कोलिन्स ओबुयाले १ सय ११ बलमा ७ चौका र २ छक्कासहित सर्वाधिक ८४ रन बनाए ।

स्पिनर साहब आलमले बोल्ड गरेपछि उनी शतक बनाउन चुकेका थिए । तल्लोक्रमका लुकास ओलुओचले २७ बलमा ५ चौका र ५ छक्कासहित आक्रामक ५७ रनको अविजित इनिङ खेलेका थिए । अन्तिम ओभरमा स्पिनर बसिर अहमदलाई लुकासले २० रन प्रहार गरेका थिए । नेपालका सोमपाल कामी र आदिल अन्सारीले दुई दुई विकेट लिए ।