एजेन्सी – नेपाली राष्ट्रिय क्रिकेट टोलीका युवा ओपनर आसिफ शेख केन्यासँगको तीन एकदिवसिय अभ्यास खेलमा प्लेयर अफ द सिरिज (सर्वोत्कृष्ट) खेलाडी चुनिएका छन् ।

केन्यालाई सिरिजमा क्लिनस्विपले हराउन आसिफले सानदार प्रदर्शन गरेका थिए । पहिलो खेलमा नेपाललाई ७ विकेटको जित दिलाउन आसिफले १ सय २० बलमा १२ चौका र २ छक्कासहित १ सय १० रनको सानदार शतकीय इनिङ खेलेका थिए ।
आसिफको शतकमा नेपालले २ सय १९ रनको लक्ष्य ४७.२ ओभरमा पूरा गरेको थियो । यस सिरिजमा शतक हान्ने आसिफ एक्लो खेलाडी हुन् ।

नेपालले दोस्रो खेलमा भने आसिफ शेखलाई विश्राम दिँदै देव खनाललाई मौका दिएको थियो । आसिफले तेस्रो खेलमा ४३ बलमा ९ चौका र २ छक्कासहित ५६ रनको उत्कृष्ट सुरुवात दिलाएका थिए । अर्जुन साउदले ५८, ज्ञानेन्द्र मल्ल ३३, रोहित पौडेल ४६ र बसिर अहमदले ५२ रन बनाएपछि नेपालले अन्तिम खेलमा ६ विकेटको सानदार जित हात पारेको थियो । नेपालले २ सय ५६ रनको लक्ष्य ४७.१ ओभरमा ४ विकेट गुमाउँदै पूरा गरेको थियो ।

नेपालले पाँच टि२० आई खेलको सिरिज भने ३–२ ले जितेको थियो । टि२० आईमा कप्तान सन्दीप लामिछाने प्लेयर अफ द सिरिज चुनिएका थिए । सन्दीप एकदिवसिय अभ्यास खेलमा भने उपलब्ध थिएनन् । सन्दीप क्यारेवियन प्रिमियर लिग खेल्न वेस्टइन्डिज गएपछि रोहित पौडेलले कप्तानी गरेका थिए ।

आसिफलाई नेपालले टि२० आई सिरिजमा भने सुरुवाती दुई खेलपछि मौका दिएको थिएन । उता खराव लयमा रहेका पवन सरार्फलाई भने लगातार मौका दिँदा टिम व्यवस्थापनको चर्को आलोचना भएको थियो । नेपाली खेलाडीले अव बिहीबार देखि काठमाडौंमा सुरु हुने नवौं राष्ट्रिय खेलकुद अन्तर्गत क्रिकेट प्रतियोगिता खेल्नेछन् । प्रतियोगितामा ७ प्रदेश, तीन विभागीय टोली र एनरआनए रहनेछन् ।

यो पनि: नेपालको ब्याटिङ सधैं कमजोर हुनुको पाँच कारण