एजेन्सी – टि२० एसिया कप २०२२ को सुपर फोरमा पाकिस्तानले अफगानिस्तानविरुद्ध टस जितेर पहिला बलिङ गर्ने निर्णय लिएका छन् । शारजाह क्रिकेट स्टेडियममा पाकिस्तानका कप्तान बाबर आजमले टस जितेर पहिला फिल्डिङ गर्ने निर्णय लिएका हुन् ।

पाकिस्तानले आजको खेलमा टोलीमा कुनै परिवर्तन गरेको छैन । अफगानिस्तानले टोलीमा दुई परिवर्तन गरेको छ । आज फरिद मलिक र आजमतुल्लाह ओमरजाईले मौका पाएका छन् । नविन उल हक र सामीउल्लाह शिनवारीलाई बेन्चमा राखेको छ ।

पाकिस्तान आजको खेलमा विजयी हुँदा फाइनल पुग्नेछ । पाकिस्तान विजयी हुँदा श्रीलंका पनि फाइनलमा स्थान पक्का गराउनेछ । तर पाकिस्तान विजयी हुँदा भारत भने सुपर फोरबाटै औपचारिक रुपमा बाहिरिनेछ । त्यसैले भारत पाकिस्तानको हार चाहन्छ ।

पाकिस्तानले सुपर फोरमा भारतलाई ५ विकेटले हराएको थियो । उक्तक्रममा पाकिस्तानले भारतले प्रस्तुत गरेको १ सय ८२ रनको लक्ष्य १९।५ ओभरमा पूरा गरेको थियो । समूह चरणमा पाकिस्तान भारतसँग ५ विकेटले नै पराजित भएको थियो । भारत श्रीलंकासँग ६ विकेटले पराजित भएपछि सुपर फोरबाटै बाहिरिने उच्च सम्भावना छ । भारतको झिनो अंक गणीतिय सम्भावना मात्र बाँकी छ । भारत फाइनलमा पुग्न पाकिस्तानले दुबै खेल हार्नुपर्छ ।

पाकिस्तान र अफगानिस्तानबीच हालसम्म दुई टि२० आई खेल भएको छ । जसमा पाकिस्तान दुबै खेलमा विजयी भएको छ । गतवर्ष अफगानिस्तानलाई हराउन आसिफ अलीले १९ औं ओभरमा करिम जन्नतलाई चार छक्का हान्दै खेल जिताएका थिए । बिहीबार भारत र अफगानिस्तानबीच प्रतिस्पर्धा हुनेछ । शुक्रबार पाकिस्तान र श्रीलंका भिड्नेछन् । श्रीलंका अनौपचारिक रुपमा फाइनलमा पुगि सकेको छ । फाइनल आइतबार हुनेछ ।