काठमाडौं (हाम्रो खेलकुद) – क्रिकेट खेलाडी संघ नेपाल (सिप्यान) ले प्रदान गरेको एनसिसी सिप्यान वर्ष उत्कृष्ट खेलाडीको पुरुषतर्फ दीपेन्द्रसिंह ऐरी र महिलातर्फ सीता रानामगरले जितेकी छिन् । त्यस्तै विशेष अवार्ड पारस खड्का, उदीयमान देव खनाल र उत्कृष्ट क्षणको अवार्ड अश्मिना कर्माचार्यले जितेकी छिन् ।

वर्ष उत्कृष्ट पुरुष खेलाडीको अवार्ड दीपेन्द्रसिंह ऐरीले जितेका छन् । दीपेन्द्रले गत मार्चमा पपुवा न्युगिनीविरुद्ध ओडिआईमा १ सय ५ र टि२० आईमा मलेसियाविरुद्ध १ सय १० रनको शतकीय इनिङ खेलेका थिए । टि२० आईमा एक खेलमा नेपाली ब्याटरको उच्च प्रदर्शन हो । टि२० आईमा एक हजार रन पूरा गर्ने पहिलो खेलाडी समेत हुन् ।

दीपेन्द्र आइसिसीको टि२० आई वरियतामा शीर्ष १० मा पर्ने पहिलो नेपाली खेलाडी समेत हुन् । दीपेन्द्रले १ लाख ३२ हजार प्राप्त गरेका छन् । वर्ष क्रिकेट खेलाडीको मनोनयमा अलराउन्डर दीपेन्द्रसिंह ऐरी, तीव्र गतिका बलर करण केसी, उपकप्तान रोहित पौडेल र ओपनर कुशल भुर्तेल थिए ।

सिप्यान वर्ष महिला उत्कृष्ट खेलाडीको अवार्ड सीता रानामगरले जितेकी छिन् । सीता नेपाली महिला क्रिकेटबाट अन्तर्राष्ट्रिय स्तरमा एक खेलमा सर्वाधिक रन बनाउने ब्याटर हुन् । उनले गतवर्ष नोभेम्बरमा कतारविरुद्ध दोस्रो टि२० आई खेलमा ८२ रनको कीर्तिमानी इनिङ खेलेकी थिइन् । सीताले १ लाख ३२ हजार प्राप्त गरिन् । महिला वर्ष उत्कृष्ट खेलाडीको मनोनयनमा ज्योति पाण्डे, ईन्दु बर्मा, सिता रानामगर, कविता कुँवर र रुविना क्षेत्री थिए ।

त्यस्तै सिप्यान विशेष अवार्ड पूर्व कप्तान पारस खड्काले जितेका छन् । पारसले १ लाख ३२ हजार पुरस्कार प्राप्त गरे । पारसको कप्तानीमा नेपालले डिभिजन पाँच देखि तीन सम्मको उपाधि, पहिलो पटक २०१४ मा टि२० विश्वकप र २०१८ मा ऐतिहासिक ओडिआई मान्यता दिलाएका थिए ।

नेपालका पूर्व सफल कप्तान तथा खेलाडी पारस टि२० आई र ओडिआई दुबैमा शतक हान्ने पहिलो खेलाडी हुन् ।

सिप्यान उदीयमान खेलाडीको अवार्ड देव खनालले जितेका छन् । उदीमायन खेलाडीको मनोेयनमा स्पिनर सागर ढकाल, अलराउन्डर आदिल अन्सारी, आक्रामक ब्याटर लोकेश बम, लेगस्पिनर हिरान्मई रोय र ओपनर देव खनाल थिए । देव खनालले गत मार्चमा पपुवा न्युगिनीसँग पहिलोे ओडिआई खेलमा डेब्यू गरेका थिए ।

दोस्रो खेलमा देवले ७२ रनको इनिङ खेलेका थिए । त्यसपछि देवले १० खेलमा २ अर्धशतक सहित २ सय ५३ रन बनाएका छन् । पुषमा लुम्बिनी प्रदेशलाई यू–१९ राष्ट्रिय प्रतियोगिताका उपाधि जिताउन सानदार प्रदर्शन गरेका थिए । त्यस्तै यू१९ एसिया कपमा नेपालको कप्तानी गरेका थिए । देवले ट्रर्फी र ६६ हजार प्राप्त गरे ।

वर्षको उत्कृष्ट क्षणको अवार्ड अश्मिना कर्माचार्यले जितेकी छिन् । यस अवार्ड भोटमार्फत प्रदान गरिएको हो । अश्मिनाले ३ हजार ७ सय १९ भोटका साथ अवार्ड जितेकी हुन् ।

अश्मिना कर्माचार्यले गत जुनमा टि२० एसिया कप छनोटको सेमिफाइनलमा युएईविरुद्ध ३.५ ओभरमा १० रन खर्चेर ५ विकेट लिएकी थिइन् । युएईलाई ८१ रनमा अल आउट गरेपनि वर्षाको कारण नेपाल एसिया कप खेल्नबाट बाहिरिएको थियो । अस्मिनाले ६६ हजार प्राप्त गरिन् ।

उत्कृष्ट क्षणको मनोनयनमा नेपालले पहिलो पटक स्कटल्यान्डलाई हराएको, अस्मिनको उक्त प्रदर्शन, कुशल मल्ल डेब्यू टि२० आईमा लगातार तीन अर्धशतक, दीपेन्द्रसिंह ऐरीको ओडिआई पपुवा न्युगिनी र टि२० आईमा मलेसियाविरुद्ध शतक थियो ।