काठमाडौं (हाम्रो खेलकुद) – ओेपनर कुशल भुर्तेल, आरिफ शेख र स्पिनर ललितनारायण राजवंशीको सानदार प्रदर्शनमा नेपाल पुलिस क्लबले नवौं राष्ट्रिय राष्ट्रिय खेलकुद अन्तर्गत क्रिकेट प्रतियोगितामा लुम्बिनी प्रदेशमाथि ७६ रनको सानदार जित हात पारेको छ ।

जितको लागि २ सय ५ रनको विशाल विजयी लक्ष्य पछ्याएको लुम्बिनीले निर्धारित २० ओभरमा ७ विकेट १ सय २८ रन बनायो । लुम्बिनीका बसिर अहमद २८ बलमा १ चौका र ४ छक्कासहित सर्वाधिक ४६ रनमा अविजित रहे । सौरभ खनाल २० बलमा ३ चौका र १ छक्कासहित २४ रनमा आउट भए । अन्य कुनैपनि ब्याटरले राम्रो प्रदर्शन गर्न सकेनन् ।

तीव्र गतिका बलर करण केसीको बलरमा ओपनर देव खनाल ६ रनमा विकेटकिपर दीलिप नाथबाट क्याच आउट भए । अर्का ओपनर प्रज्वल थापालाई करणले १० रनमा एलबीडब्लू आउट गरे । ललितनारायण राजवंशीले सन्दीप रजालीलाई ७ रनमा आरिफ शेखबाट क्याच गराएका थिए ।

गुलशन झाको बलमा विशाल विक्रम केसी ४ रनमा आउट भए । १३ औं ओभरको अन्तिम बलमा ललितले सौरभ खनाललाई बोल्ड गरेपछि जित नजिक पुगेको थियो । लुम्बिनीलाई अन्तिम १० ओभरमा १ सय ६६ रन चाहिँएको हुँदा जित त्यहिँ टाढि सकेको थियो ।

ललितले नै कप्तान कृष्ण कार्कीलाई ६ रनमा बोल्ड गरे । गुलशन झाले तुलबहादुर थापालाई ६ रनमा बोल्ड गरेपछि लुम्बिनी ७७–७ को अवस्थामा पुगेको थियो ।

पुलिसका ललितनारायण राजवंशीले ४ ओभरमा २१ रन खर्चेर ३ विकेट लिए । करण केसीले ४ ओभरमा १ मेडनसहित २७ रन खर्चेर २ विकेट लिए । गुलशन झा ४ ओभरमा १ मेडनसहित १४ रन खर्चेर ३ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको पुलिसले निर्धारित २० ओभरमा ४ विकेट गुमाउँदै २ सय ४ रन बनाएको थियो । पुलिसका ओपनर कुशल भुर्तेल ३६ बलमा ७ चौका र ५ छक्कासहित ७५ रनको विष्फोटक इनिङ खेले ।

आरिफ शेख २२ बलमा ३ चौका र ४ छक्कासहित ५० रनमा अविजित रहे । आरिफले अन्तिम बलमा दुई रन लिँदै अर्धशतक हानेका थिए । आरिफले २२ बलमा र कुशलले २३ बलमा अर्धशतक हानेका थिए ।

कुशल स्पिनर बसिर अहमदको दशौं ओभरको पाँचौं बलमा एलबीडब्लू आउट भएपछि शतक बनाउन २५ रनले चुकेका थिए । जुन समय पुलिसले १ विकेट गुमाउँदै ९७ रन बनाई सकेको थियो ।

अर्का ओपनर सुनिल धमला १३ औं ओभरको पाँचौं बलमा एज लागेर ३५ रनमा कृष्ण कार्कीबाट क्याच आउट भए । धमलाले ३१ बलमा ३ चौका र १ छक्का ३५ रनमा आउट भए । कप्तान दीपेन्द्रसिंह ऐरी स्पिनर अनिल खरेलको १४ औं ओभरको अन्तिम बलमा ३ रनमा विकेटकिपर प्रज्वल थापाबाट क्याच भए ।

दीलिप नाथ २७ बलमा २ चौका र १ छक्कासहित ३३ रनमा आउट भए । लुम्बिनीका बसिर अहमद, अनिल खरेल, दीपेन्द्र रावत र विशाल विक्रम केसीले एक एक विकेट लिए ।

आजको खेलमा पुलिसले मञ्जित श्रेष्ठलाई बेन्चमा राखेको छ । मञ्जित राष्ट्रिय प्रतियोगितामा पहिलो पटक बेन्चमा बसेका हुन् । दीपेन्द्रसिंह ऐरीले पहिलो पटक पुलिसको कप्तानी गरेका छन् ।

समूह ए मा मधेश प्रदेश, लुम्बिनी प्रदेश, कर्णाली प्रदेश, नेपाल पुलिस क्लब, त्रिभुवन आर्मी क्लब र गण्डकी प्रदेश हुनेछन् । समूह बी मा एनआरएनए नेपाल, सुदूरपश्चिम प्रदेश, बागमती प्रदेश, प्रदेश नम्बर १ र नेपाल एपिएफ क्लब छन् । शीर्ष दुई दुई टोली सेमिफाइनलमा पुग्नेछन् । सेमिफाइनल भदौ ३० र फाइनल भदौ ३१ मा हुनेछ ।

पुलिसले वर्षाको कारण मधेश प्रदेशसँग भने वर्षाको कारण अंक बाँडेको थियो । सुदूरपश्चिमलाई ९ विकेटले हराएको थियो । पुलिसले चौथो खेलमा मंगलबार मुलपानीमा गण्डकी प्रदेशसँग खेल्नेछ । यता लुम्बिनीको यो तेस्रो खेल हो । लुम्बिनीले कर्णाली, गण्डकी र मधेश प्रदेशसँग अंक बाँडेको थियो । लुम्बिनीले अन्तिम खेल मंगलबार आर्मीसँग खेल्नेछ ।

पुलिस समूह ए मा ५ अंकका साथ शीर्ष स्थानमा छ । आर्मी ४ अंकका साथ दोस्रो स्थानमा छ । आजको पहिलो खेलमा भने आर्मीले मधेश प्रदेशलाई ६ विकेटले हराएको थियो ।