काठमाडौं (हाम्रो खेलकुद) – नवौं राष्ट्रिय खेलकुद अन्तर्गत ३४ औं क्रिकेट प्रतियोगितामा उपाधिको प्रमुख दावेदार विभागीय टोली नेपाल एपिएफ क्लब पनि एक खेल खेल्न नपाइ बाहिरिएको छ ।

वर्षाको कारण चार खेलमा नै अंक बाँड्नु परेपछि उपाधि दाबेदार एपिएफ समूह बी चरणबाटै बाहिरिएको छ । यसअघि बागमती पनि अघिल्लो दिन लगातार चौथो खेल खेल्न नपाएपछि बाहिरिएको थियो ।

बागमती र एपिएफ समूह बी बाट एक खेल पनि नखेली बाहिरिएपछि आज बेलुका साँझ ५ बजे राष्ट्रिय खेलकुद परिषद् (राखेप) मा यसबारे बैठक बोलाइएको छ । उक्त बैठकमा सहभागी टोलीले खेल तालिका परिमार्जन गर्दै रद्द भएका खेल खेल्न पाउनु पर्ने माग राख्ने बुझिएको छ । कम्तिमा मुलपानीका खेलहरु पुन: गर्ने अथवा पूरा प्रतियोगिता नै अर्को मितिमा गर्ने सम्मको सम्भावना रहेको छ । तर नेपाल टि२० लिगलाई असर पर्ने हुँदा सार्न नहुने क्यानले बताउँदै आएको छ । नेपाल टि२० लिग असोज ८ देखि सुरु हुने तालिका छ । तर आन्तरिक तयारी हेर्दा नेपाल टि२० समयमा हुनेबारे दुविधा पनि छ ।

बागमती प्रदेश खेलकुद परिषद्का सदस्य सचिव सूर्यलाल भण्डारीले आज विहान हाम्रो खेलकुदमा आएको समाचार सामाजिक संजालमा हाल्दै असन्तुष्टि पोखेका थिए । उनले लेखेका छन्, ‘क्रिकेटको विषयमा केही पुनर्विचार हुन्छ, खेल्दै नखेली आउट हुनु र नतिजा घोषणा गर्नु हुँदैन भन्ने हाम्रो सुझाव छ । आज दिन भरमा नयाँ निर्णय आउछ । कि त सबै म्याच खेल्न पाउनु पर्छ, कि त गेम नै रि सेडुल गरि अर्को मितिमा गर्नुपर्छ ।’

समूह बी बाट एपिएफ र बागमती दुबै एक पनि खेल खेल्न नपाइ बाहिरिएका हुन् । वर्षाको कारण निकै प्रभावित बनेको प्रतियोगिताको तालिका हेर्ने हो भने २२ खेल सकिएका छन् । तर २२ खेल मध्य पाँच खेल मात्र पूरै २० ओभर भएका छन् । एक खेल ६ ओभरको भएको थियो । १६ खेल भने वर्षाको रद्द हुन पुग्यो । जसमध्य १५ खेल टस पनि हुन सकेको थिएन ।

टस पनि हुन नपाई सबै खेल रद्द भएपछि अंक बाँड्नु पर्यो । समूह ए मा मधेश प्रदेश, कर्णाली, त्रिभुवन आर्मी क्लब, नेपाल पुलिस क्लब, गण्डकी प्रदेश र लुम्बिनी प्रदेश छन् । समूह बी मा एनआरएनए नेपाल, बागमती प्रदेश, सुदूरपश्चिम प्रदेश, प्रदेश १ र नेपाल एपिएफ क्लब छन् । मुलपानीमा हुनुपर्ने सबै ११ खेल टस समेत नभई रद्द हुँदा अंक बाँडेर सक्नु पर्यो । यता टियुमा पाँच खेल वर्षाको कारण रद्द भएका थिए ।

सेमिफाइनलको दाबेदार मानिएको बागमती प्रदेशले समूह बी मा चार खेलमा एक खेल पनि नखेली समूह चरणबाटै बाहिरिनु पर्यो । बागमतीको पहिलो खेल भदौ २३ मा बागमती र प्रदेश १ बीच टियु मैदानमा थियो । बागमतीका कप्तान ज्ञानेन्द्र मल्ल टसका लागि मैदान छिरेपनि वर्षाको कारण फर्कनु परेको थियो । दोस्रो खेलमा बागमती र सुदूरपश्चिमबीचको खेल टियु मैदानमा वर्षाको कारण हुन सकेन ।

आइतबार मुलपानीमा बागमतीले एनआरएनए नेपालसँग अंक बाँड्यो । अन्तिम खेलमा सोमबार बागमतीले एपिएफसँग पनि अंक बाँडेपछि बाहिरिनु परेको हो । समूह बी को अन्तिम खेलमा मुलपानीम सुदूरपश्चिम र एपिएफले वर्षाको अंक बाँडेका छन् । योसँगै एपिएफ पहिलो चरणबाटै बाहिरिएको छ ।

समूह बी मा एनआरएनए नेपाल ४ खेलमा १ मा जित र ३ खेलमा अंक बाँड्दै ५ अंक जोडेर शीर्ष स्थानमा रहँदै सेमिफाइनलमा स्थान बनायो । समूह बी बाट एनआरएन नेपाल सेमिफाइनलमा पुग्ने पहिलो टोली हो । एनआरएनएले सुदूरपश्चिम प्रदेशलाई १२ रनले हराउँदा अन्य सबै टोलीसँग अंक बाड्यो ।

दोस्रो खेलमा एनआरएनले एपिएफसँग १३.३ ओभरमा टियुमा २ विकेट गुमाउँदै १ सय २० रन बनाएको अवस्थामा खेल स्थगित भएको थियो । टस भएर पनि खेल हुन नसकेको यो मात्र एक खेल हो । सुदूरपश्चिम ४ खेलमा १ मा जित, १ मा हार र २ खेलमा अंक बाँड्दै दोस्रो स्थानमा रहेर सेमिफाइनलमा स्थान बनायो । तीन टोली बागमती, सुदूरपश्चिम र एपिएफको समान ४ अंक भएपनि सर्वाधिक जितको कारण सुदूरपश्चिमले सेमिफाइनलमा स्थान बनाएको हो ।

बागमती ४ खेलमा अंक बाड्दै ४ अंकका साथ तेस्रो स्थानमा रह्यो । एपिएफ ४ खेलमा चारनै अंक बाँडेर चौथो स्थानमा रह्यो । समूह बी का कुल १० खेल हुनुपर्ने भएपनि दुई खेलको मात्र नतिजा आयो । अन्य ८ खेलमा अंक बाड्नु पर्यो । पहिलो खेलमा एनआरएनएले सुदूरपश्चिमलाई ६–६ ओभरको खेलमा १२ रनले हराएको थियो । दोस्रो खेलमा सुदूरपश्चिम प्रदेशले प्रदेश एकलाई १३ रनले हराएको थियो । अन्य कुनैपनि खेल हुन सकेको छैन ।

यता समूह ए मा नेपाल पुलिस क्लब ४ खेलमा २ मा जित र २ अंक बाँड्दै ६ अंकका साथ शीर्षस्थानमा छ । पुलिसले टियु मैदानमा कर्णालीलाई ९ विकेट र लुम्बिनी प्रदेशलाई ७६ रनले हराएको थियो । मुलपानीमा मधेश प्रदेश र गण्डकीसँग अंक बाड्यो । आज नै पहिलो खेलमा मुलपानीमा गण्डकी र पुलिसले अंक बाँडेका थिए ।

आर्मी ३ खेलमा १ मा जित र २ खेलमा अंक बाँड्दै ४ अंक जोडेर दोस्रो स्थानमा छ । आर्मीले कर्णाली र गण्डकीसँग अंक बाँडेको थियो । आर्मीले मधेश प्रदेशलाई ६ विकेटले हराएको थियो । आमी र लुम्बिनीबीचको खेल टियुमा जारी छ । सुशन भारीको ह्याट्रिक सहित पाँच विकेटमा आर्मीले ८६ रनको सामान्य लक्ष्य पाएको छ ।

कर्णाली प्रदेश ४ खेलमा १ मा जित, १ मा हार र २ खेलमा अंक बाड्दै ४ अंकका साथ तेस्रो स्थानमा छ । कर्णालीले मधेश प्रदेशलाई तीन रनले हराएको थियो । पुलिससँग ९ विकेटले हारेको थियो । आर्मी र लुम्बिनीसँग भने वर्षाको कारण अंक बाड्नु परेको थियो । गण्डकी अव कर्णालीसँग मात्र खेल्न बाँकी छ ।

गण्डकी सबै ४ खेलमा अंक बाँड्दै चौथो स्थानमा छ । लुम्बिनी ४ खेलमा १ मा हार र तीनमा अंक बाँड्दै ३ अंक जोडेर पाँचौं स्थानमा छ । मधेश प्रदेश ५ खेलमा २ मा हार र तीन खेलमा अंक बाँड्दै ३ पुछारमा रहेर बाहिरियो ।

बुधबार टियु मैदानमा पहिलो खेलमा कर्णाली र गण्डकी तथा दोस्रो खेलमा नेपाल पुलिस र आर्मीबीच प्रतिस्पर्धा हुनेछ । सेमिफाइनल भदौ ३० र फाइनल भदौ ३१ मा हुनेछ ।