काठमाडौं (हाम्रो खेलकुद) – विभागीय टोली नेपाल पुलिस क्लबले नेपाली राष्ट्रिय क्रिकेट टोलीकी कप्तान रुविना क्षेत्री बेलबासेको नेतृत्वमा पहिलो पटक महिला क्रिकेट टोली निर्माण भएको छ ।

पुलिसको महिला टोलीले नवौं राष्ट्रिय खेलकुद अन्तर्गत महिला क्रिकेट प्रतियोगितामा पोखरामा खेल्दै डेब्यू गर्नेछ । पुलिसले रुविनादेखि कविता कुँवरसम्मका नेपाली क्रिकेट स्टार खेलाडीलाई समेट्दै मजबुत टोली निर्माण गर्दै सानदार डेब्यूको तयारीमा छ । योसँगै महिला क्रिकेट टोली बनाउन अब विभागीय टोलीमा त्रिभुवन आर्मी क्लबमात्र बाँकी रहने भएको छ । नेपाल एपिएफ क्लबले २०६५ साल देखिनै महिला क्रिकेटमा एकछत्र राज गर्दै आएको छ ।

यता पुलिसको पुरुष टोलीले भने २०६७ सालदेखि घरेलु क्रिकेटमा प्रतिस्पर्धा गर्दै आएको थियो । घरेलु क्रिकेटमा पुलिसको प्रदर्शन सानदार छ । नवौंमा पुलिसको टोलीले भने शुक्रबार त्रिभुवन आर्मी क्लबलाई फाइनलमा ८ विकेटले हराउँदै ऐतिहासिक स्वर्ण जितेको थियो ।

‘हाम्रो महिला टोलीको कप्तान रुविना नै हो । पुरुष टिम त पहिलादेखि छ । अब महिला टोली पनि थपेका छौं । हामी उत्कृष्ट टोली निर्माण गर्ने सोचमा छौं । आउने दिनमा देशलाई योगदान दिने खेलाडी उत्पादन गर्ने सोच राखेका छौं’, नेपाल पुलिस खेलकुद शाखाका प्रमुख रुकेश तण्डुकारले हाम्रो खेलकुदसँग भने ।

‘हामी विस्तारै खेलाडीलाई स्थायी रुपमा राख्न प्रक्रिया अघि बढाउने छौं । त्यसको लागि हामी आन्तरिक प्रक्रियामा जानुपर्छ । हामीले अहिले टिम बनाएका छौं । यसले अब निरन्तरता पाउँछ । यो धेरै पहिला देखिनै २०६४/६५ सालदेखि बनाउने भनेको कुरा हो । दशकपछि आएपछि पूरा भयो । अब छिटो भन्दा छिटो तयारीमा लाग्नेछौं’, उनले भने ।

‘कुनैपनि खेलकुदमा लागेपछि खेलाडीलाई रोजगारीको कुरा पनि आउँछ । जहाँ पनि आर्थिक पक्षको कुरा आउँछ । विभागमा जादा कहाँ बढी राम्रो हुन्छ भन्ने हो । आर्थिक पक्ष पनि अब बलियो हुन्छ’, तण्डुकारले भने ।

त्यसैमा उनले थपे, ‘हाम्रो नवौंमा लक्ष्य विगत आठौंमा भन्दा धेरै मेडल जित्ने हुन्छ । मेडल मात्र नभएर पनि उत्कृष्ट प्रदर्शन गर्ने हुन्छ ।’

पुलिसले प्रदेश एक र सुदूरपश्चिम प्रदेशका स्टार खेलाडी समेटेर टोली निर्माण गर्ने तयारी गरेको छ । प्रदेश एकबाट रुविनासँगै विकेटकिपर काजल श्रेष्ठ, अलराउन्डर अप्सरी बेगम, तीव्र गतिकी बलर सबनम राई, स्पिनर संगिता राई र लेगस्पिनर हिरान्मई रोयलाई अनुबन्ध गर्ने प्रक्रिया थालेको छ । यी सबै वर्तमान राष्ट्रिय टोलीका सदस्य हुन् ।

त्यस्तै सुदूरपश्चिमकी तीव्र गतिकी बलर कविता कँवुर, बायाँ हाते बलर ईश्वरी विष्ट, युवा ओपनर रेवती धामी, हिटर कविता जोशी, युवा स्पिनर मनिषा उपाध्यय र लेगस्पिनर लक्ष्मी साउद पनि पुलिसको सूचीमा छन् । यद्यपी पुलिसले सबै खेलाडीको नाम प्रक्रियामै रहेकोले अधिकारिक रुपमा खुलाएको छैन ।

कविता कुँवर नेपाली महिला क्रिकेटमै सर्वाधिक तीव्र गतिकी बलरको रुपमा चिनिन्छिन् । नेपाली महिला क्रिकेट टोलीबाट लगातार उत्कृष्ट प्रदर्शन गर्दै आएकी छिन् । सुदूपश्चिमलाई दुई संस्करणको ललितपुर मेयर्स वुमन्स टि२० च्याम्पियनसिपको लगातार फाइनलमा पुर्याउन कविताको योगदान महत्वपूर्ण थियो । उनी ब्याटिङका लागि चिनिन्छिन् ।

पुलिसले बागमती प्रदेशकी तीव्र गतिकी बलर अश्मिना कर्माचार्य, अलराउन्डर सुमन खतिवडा र सुदूरपश्चिमको हिटर डली भट्टलाई पनि टोलीमा राख्न प्रस्ताव गरेको बुझिएको छ । उनीहरुले भने यो सिजन प्रदेशबाट खेल्ने जवाफ दिएका थिए । पुलिसले नवौंमा लक्षित गर्दै पुलिस एकेडेमीमै युवा खेलाडीलाई प्रशिक्षणमा राख्ने तयारी गरेको छ ।

पुलिसको सूचीमा रहेकामध्य लक्ष्मी साउद, रेवती धामी, ईश्वरी विष्ट र मनिषा उपाध्य मात्र नेपाली टोलीबाट डेब्यू गरेका छैनन् । मनिषा, ईश्वरी र लक्ष्मीले नेपाली यू१९ महिला टोलीबाट प्रतिनिधित्व भने गरिसकेका छन् । मनिषाले घरेलु क्रिकेट भने गण्डकीबाट खेल्दै आएकी छिन् ।

घरेलु क्रिकेटमा यी सबै खेलाडीको प्रदर्शन उत्कृष्ट छ । अन्य भने सबै नेपाली महिला क्रिकेट टोलीकै प्रमुख खेलाडीको रुपमा रहँदै आएका छन् । महिला घरेलु क्रिकेटका सर्वाधिक सफल प्रदेश टोली सुदूर र प्रदेश एक भने प्रमुख खेलाडीले छाड्दा कमजोर हुने देखिएको छ । घरेलु क्रिकेटमा सिनियर टोलीको बाहुल्यता भएको पुलिस र एपिएफबीच कडा प्रतिस्पर्धा हुने अनुमान गरिएको छ ।