एजेन्सी – पाकिस्तानले दोस्रो टि२० आई खेलमा आज इंग्ल्यान्डसँग खेल्दैछ । खेल नेपाली समय अनुसार बेलुका ८ : १५ मा कराँची स्टेडियममा सुरुहुनेछ । ७ टि२० आई खेलको सिरिजमा इंग्ल्यान्डले १–० को अग्रता लिएको छ ।

पहिलो खेलमा पाकिस्तान इंग्ल्यान्डसँग ६ विकेटले पराजित भएको थियो । पाकिस्तानलाई हराउन तीन वर्षपछि टोलीमा फर्किएका एलेक्स हेल्सले अर्धशतक प्रहार गरेका थिए । तर घरेलु टोली पाकिस्तानलाई भने मध्यक्रम ब्याटिङकै चिन्ता छ ।

पाकिस्तानको ब्याटिङ ओपनर बाबर आजम र मोहम्मद रिजवानमा बढी निर्भर छ । बाबर पनि पछिल्लो समयमा लयमा छैनन् । जसले मध्यक्रम ब्याटिङले झनै चिन्ता थपेको छ । पाकिस्तानले लामो समयदेखि यो समस्या अन्त्य गर्न सकेको छैन । पहिलो खेलमा रिजवानले ६८ र बाबरले ३१ रन बनाएका थिए ।

मध्यक्रमका शन मकसुद ७, हैदर अली ११, इफ्तिखर अहमद २८, मोहम्मद नवाज ५ र खुशदील शाह ४ रन बनाएका थिए । मध्यक्रममा हैदर अली, शन मकसुद, आसिफ अली र खुशदील शाहबाट पाकिस्तान उच्च प्रदर्शन चाहन्छ । एसिया कप फाइनलमा श्रीलंकाविरुद्ध रिजवानले ५५, इफ्तिखार अहमद ३२ र हरिस रौफले १३ रन बनाउन बाहेक अन्यले दोहोरो अंकमा रन बनाउन सकेका थिएनन् ।

सुपर फोरमा श्रीलंकाविरुद्ध १ सय २१ रनमा अल आउट हुँदा बाबर आजमले ३० रन बनाएका थिए । लामो समयदेखि समस्याको रुपमा मध्यक्रम पाकिस्तान यस सिरिजबाट अन्त्य गर्न चाहन्छ । पाकिस्तानले इफ्तिखर अहमदको स्थानमा अमर जामललाई मौका दिनसक्छ । उनी तीव्र गतिको बलिङसँगै तल्लोक्रममा राम्रो ब्याटिङ गर्न सक्छन् । बाबर र रिजवानको प्रदर्शनमा पाकिस्तानको योगफल निर्धारण हुने देखिन्छ ।

पाकिस्तानको तीव्र गतिको बलिङ आक्रामण भने मजबुत छ । पहिलो खेलमा शाहिन शाह अफ्रिदी बेन्चमा थिए । अफ्रिदी फर्किदा शहनवाज धानी बेन्चमा बस्न सक्छन् । अफ्रिदी, नसिम शाह र हरिस रौफ तीव्र गतिका बलरमा हुनेछन् । नवाज र उस्मान कादिर स्पिन आक्रामणमा हुनेछन् ।

इंग्ल्यान्डको ओपनिङ फिलिप साल्ट र एलेक्स हेल्सले गर्नेछन् । युवा ब्याटर साल्टबाट इंग्ल्यान्ड आक्रामक सुरुवात चाहन्छ । मध्यक्रममा डेविड मलान, बेन डुकेट र ह्यारी ब्रक रहनेछन् । ब्रुक पहिलो खेलमा २५ बलमा ७ चौकासहित ४२ रनमा अविजित गिए । ब्रुक युवा पुस्ताका मध्यक्रमका भरपर्दा ब्याटर हुन् ।

तल्लोक्रममा मोईन अली, साम करन र डेविड विल्ली हुनेछन् । डेब्यू खेलमा उत्कृष्ट प्रदर्शन गरेका ल्यूक वुडले निरन्तरता पाउनेछन् । उनलाई रिचर्ड ग्लेसनले साथ दिनेछन् । स्पिनरमा आदिल राशिद र मोईन अली हुनेछन् । इंग्ल्यान्ड १७ वर्षपछि पाकिस्तान भ्रमण गरेको हो । कप्तान जस बटलर भने टोलीका कारण दोस्रो खेल पनि खेल्नेछैनन् ।

यो पनि : भारतले टि२० विश्वकप २०२२ जित्न नसक्ने पाँच कारण