एजेन्सी – दक्षिण अफ्रिकाका युवा ब्याटर डेवाल्ड ब्रेभिसले क्यारेवियन प्रिमियर लिग (सिपिएल) मा पाँच बलमा पाँच छक्का हानेका छन् । सेन्ट किट्स एण्ड नेभिस प्याट्रियटसबाट खेल्दै ट्रिनबागो नाइट राइडर्सविरुद्ध उक्त प्रदर्शन गरेका हुन् ।

गुयानामा टस जितेर पहिला ब्याटिङ थालेको सेन्ट किट्सले निर्धारित २० ओभरमा ६ विकेट गुमाउँदै १ सय ६३ रन बनायो ।
डेवाल्ड ब्रेभिसले ६ बलमा ५ छक्कासहित ३० रनमा अविजित रहे । शेर्फान रदरफोर्ड ५० बलमा ६ चौका र ५ छक्कासहित सर्वाधिक ७८ रनमा आउट भए । ब्रेभिसले खेलेको अन्तिम पाँच बलमा पाँच छक्का हानेका थिए ।

१७ औं ओभरको अन्तिम बलमा ड्वेन ब्राभो आउट भएपछि ब्रेभिस ब्याटिङका लागि मैदान छिरेका थिए । १८ औं ओभरको दोस्रो बलमा ब्रेभिसले लेग वाइको रुपमा एक रन बटुल्दै रदरफोर्डलाई स्ट्राइक दिए । आन्द्रे रसेललाई त्यसपछि रदरफोर्डले एक छक्का र दुई चौका प्रहार गरे ।

अन्तिम बलमा एक रन लिँदै रदरफोर्डले स्ट्राइक आफूमा राखे । १९ औं ओभरको तेस्रो बलमा एक रन लिदै रदरफोर्डले स्ट्राइक ब्रेभिसलाई दिए । स्पिनर अकिल हुसैनलाई त्यसपछि बाँकी तीन बलमा लगातार तीन छक्का हानेका थिए ।

अन्तिम ओभरको चौथो बलमा राशिद खान पनि आउट भएपछि ब्रेभिसले स्ट्राइक पाएका थिए । त्यसपछि ब्रेभिसले डरिन डुपाभिलनलाई दुई लगातार छक्का हानेका थिए । उनले खेलेको अन्तिम पाँच बलमा पाँच छक्का हाने ।

ब्रेभिस अर्को महिना अष्ट्रेलियामा हुने टि२० विश्वकपको लागि दक्षिण अफ्रिका टोलीमा भने छैनन् । यू-१९ विश्वकप र फ्रेन्चाइज लिगमा सानदार प्रदर्शन गरेका ब्रेभिस दक्षिण अफ्रिका टोलीमा ढोका ढक्ढकाएका छन् । हालसम्म भने उनी दक्षिण अफ्रिका सिनियर टोलीमा भने परेका छैनन् ।

गतवर्ष आइपिएलमा मुम्बई इन्डियन्सबाट खेल्दै उत्कृष्ट प्रदर्शन गरेका थिए । ब्रेभिसको खेल्ने शैली सबै एवी डिभिलियर्ससँग मिल्ने हुँदा उनलाई बेबी एवी पनि भन्ने गरिन्छ ।

ब्रेभिसको क्रिकेट जीवनी पढ्नुहोस् : डेवाल्ड ब्रेभिस : बेबी एवि उर्फ दोस्रो डि भिलियर्स