एजेन्सी – पाकिस्तान क्रिकेट टोलीका कप्तान बाबर आजम र मोहम्मद रिजवान टि२० आई खेलमा सर्वाधिक सफल जोडी बनेका छन् । बाबर र रिजवान टि२० आईमा सर्वाधिक धेरै रन र शतकीय साझेदारी गर्ने जोेडी हुन् ।

रिजवान र बाबरले २०१९ देखि ३८ इनिङ खेलमा साझेदारी गर्दा दुई पटक अविजित रहँदै कुल २ हजार ४ सय ४३ रन बनाएका छन् । यी दुई जोडीले एक पटक दोहोरो शतकीय, ६ पटक शतकीय र ७ पटक शतकीय साझेदारी गरेका छन् ।

रिजवान र बाबरले ओपनर जोडीको रुपमा ३३ इनिङमा ६ मा शतकीय र ५ मा अर्धशतकीय साझेदारीको रुपमा १ हजार ७ सय ३५ रन बनाएका छन् । गतवर्ष पाकिस्तानले विश्वकप इतिहासमा भारतमा पहिलो पटक हराउँदा रिजवान र बाबरले सानदार ब्याटिङ गर्दै १० विकेटको जित दिलाएका थिए ।

बिहीबार दोस्रो टि२० आई खेलमा इंग्ल्यान्डलाई १० विकेटले हराउन बाबर र रिजवानले २ सय ३ रनको अविजित साझेदारी गरेका थिए । जुन विजयी लक्ष्य पछ्याउँदा पहिलो पटक टि२० क्रिकेट इतिहासमा दोहोरो शतकीय साझेदारी थियो ।

यी दुई जोडीपछि भारतका रोहित शर्मा र शिखर धवनले २०१३ देखि २०१९ सम्म ५२ इनिङमा १ हजार ७ सय ४३ रन बनाएका छन् । जसमा चार पटक शतकीय र ७ पटक अर्धशतकीय साझेदारी गरेका छन् ।

सर्वाधिक साझेदारीमा टि२० आईमा तेस्रो स्थानमा आयरल्यान्डका केभिन ओ ब्रायन र पउल स्टर्लिङ छन् । यी दुई जोडीले ४९ इनिङमा तीन शतकीय र १० अर्धशतकीय साझेदारी गर्दै १ हजार ७ सय २० रन बनाएका छन् ।

त्यस्तै लोकेश राहुल र रोहित शर्माले ३४ इनिङमा १ हजार ७ सय ४ रन बनाएका छन् । जसमा ५ शतकीय र ९ अर्धशतकीय साझेदारी गरेका छन् । बाबर र रिजवानपछि सर्वाधिक शतकीय साझेदारीमा रोहित र राहुल छन् ।

गत विहीबार बाबर र रिजवानले इंग्ल्यान्डविरुद्ध २ सय ३ रनको अविजित साझेदारी गरेका थिए । टि२० आईमा २ सय रनको योगफल कुनै विकेट नगुमाई पहिलो पटक पूरा गरेको हो । रिजवान र बाबरले २०२१ को अप्रिलमा दक्षिण अफ्रिकाविरुद्ध १ सय ९७ रनको साझेदारी गरेका थिए । जसको सहयोगमा २ सय ४ रनको लक्ष्य १२ बल अगाडिनै २ विकेट गुमाएर पूरा गरेको थियो ।

रिजवान र बाबरले गतवर्ष कराँचीमा वेस्टइन्डिजविरुद्ध पहिलो विकेटका लागि १ सय ५८ रनको साझेदारी गरेका थिए । गतवर्ष विश्वकपमा भारतलाई हराउन रिजवान र बाबरले १ सय ५२ रनको अविजित साझेदारी गरेका थिए । जुन टि२० आई क्रिकेटमा भारतको पहिलो १० विकेटको हार थियो ।

टि२० क्रिकेटमा १ सय ५० माथि पाँच पटक साझेदारी गर्ने पनि यी दुई जोडी पहिलो हुन् । २०२१ को जुलाईमा इंग्ल्यान्डविरुद्ध नै बाबर र रिजवानले १ सय ५० रनको साझेदारी गरेका थिए ।

२०२१ मा जिम्बावेविरुद्ध १ सय २६ र नामिबियाविरुद्ध १ सय १३ रनको शतकीय साझेदारी गरेका थिए । पाकिस्तान यी दुई खेलाडीमा मात्र बढी निर्भर छ । मध्यक्रम र तल्लोक्रम ब्याटिङ कमजोर हुँदा यी दुई नचल्दा भने पाकिस्तान समस्यामा पर्दै आएको छ ।

रिजवान र बाबरको क्रिकेट जीवनी पढ्नुहोस् :

विश्व क्रिकेटका वादशाह बाबर

रिजवान : आइसियुबाट उठेर मैदानमा प्रदर्शन