एजेन्सी – इंग्ल्यान्डले सातौं तथा निर्णायक टि२० आई खेलमा कमजोर फिल्डिङको फाइदा उठाउँदै घरेलु टोली पाकिस्तानलाई सिरिज जित्न २ सय १० रनको विशाल लक्ष्य दिएको छ । लाहोरमा टस हारेर पहिला ब्याटिङको निम्तो पाएको इंग्ल्यान्डले निर्धारित २० ओभरमा ३ विकेट गुमाउँदै २ सय ९ रन बनायो ।

इंग्ल्यान्डका डेविड मलान ४७ बलमा ८ चौका र ३ छक्कासहित सर्वाधिक ७८ रनमा अविजित रहे । युवा ब्याटर ह्यारी ब्रुक २९ बलमा १ चौका र ४ छक्कासहित ४६ रनमा अविजित रहे । इफ्तिखर अहमदको १२ औं ओभरको पाँचौं बलमा कप्तान बाबर आजमले डेविड मलानको क्याच डिप एक्स्ट्रा कभरमा ब्यक्तिगत २९ रनमा ड्रप गर्दै जीवनदान दिएका थिए ।

जुन ड्रप पाकिस्तानलाई ठूलो भारी पर्यो । बाबरले ह्यारी ब्रुकको क्याच २४ रनमा ड्रप गरेका थिए । चौथो विकेटका लागि ब्रुक र मलानले ६१ बलमा १ सय ८ रनको सानदार अविजित शतकीय साझेदारी गर्दै विशाल योगफलमा पुर्याए । ओपनर एलेक्स हेल्स र फिलिप साल्टले पहिलो विकेटका लागि ४.१ ओभरमा ३९ रनको साझेदारी गरेका थिए ।

तीव्र गतिका बलर मोहम्मद हसनैनले ओपनर एलेक्स हेल्सलाई १८ रनमा एलबीडब्लू आउट गरे । हेल्सले १३ बलमा ३ चौका प्रहार गरे । दुई बलपछि ओपनर फिलिप साल्ट १२ बलमा ३ चौकासहित २० रनमा रन आउट भए । बेन डकेट १९ बलमा ३ चौका र १ छक्कासहित ३० रनमा रन आउट भए । पाकिस्तानका मोहम्मद हसनैनले एक विकेट लिए । सात टि२० आई सिरिज ३–३ को बराबरी अवस्थामा छ ।