एजेन्सी – आइसिसी टि२० विश्वकप वार्मअप खेलमा वेस्टइन्डिजले युएईमाथि १७ रनको कठिन जित हात पारेको छ । जितको लागि १ सय ५२ रनको मध्यम लक्ष्य पछ्याएको युएईले निर्धारित २० ओभरमा ६ विकेट गुमाउँदै १ सय ३६ रन बनायो ।

युएईका मोहम्मद वासिमले ५२ बलमा ४ चौका र ३ छक्कासहित सर्वाधिक ६९ रन बनाए । जवाद फरिद १४ बलमा ४ चौका र १ छक्कासहित २९ रनमा अविजित रहे । अन्य ब्याटरले दोहोरो अंकमा रन बनाउन सकेनन् ।

ओपनर चिराग सुरी ९, सिपी रिजवान १ र वृत्य अरविन्द ९ रनमा आउट भए । वेस्टइन्डिजका रायमन रिफरले ४ ओभरमा १७ रन खर्चेर ३ विकेट लिए । ओबेद म्याककोय र ओडेन स्मिथले एक एक विकेट लिए ।

मेलबर्नमा टस हारेर पहिला ब्याटिङको निम्तो पाएको वेस्टइन्डिजले निर्धारित २० ओभरमा ९ विकेट गुमाउँदै १ सय ५२ रन बनाएको थियो । वेस्टइन्डिजका ब्रेन्डन किंगले ४५ बलमा ७ चौका र २ छक्कासहित सर्वाधिक ६४ रन बनाए ।

निकोलस पुरन ३१ बलमा ५ छक्कासहित ४६ रनमा आउट भए । अन्य ब्याटरले भने राम्रो प्रदर्शन गर्न सकेनन् । युएईका जुनैद सिद्दिकले ४ ओभरमा १३ रन खर्चेर ५ विकेट लिए । जहुर खानले दुई, कासिफ दाउद र जवार फरिदले एक एक विकेट लिए ।

वेस्टइन्डिजले दोस्रो वार्मअप खेलमा बुधबार नेदरल्यान्ड्ससँग खेल्नेछ । बिहीबार युएईले वार्मअप खेलमा स्कटल्यान्डसँग खेल्नेछ ।