काठमाडौं (हाम्रो खेलकुद) – बलात्कार आरोप लागेका नेपाली राष्ट्रिय क्रिकेट टोलीका निलम्बित कप्तान सन्दीप लामिछानेलाई सोमबार काठमाडौं जिल्ला अदालतमा पेस गरिएको छ ।

नेपाल प्रहरीले १० दिनको लागि म्याद थप गर्न माग गरेपनि अदालतले ७ दिन हिरासतमा राखेर अनुसन्धान गर्न अनुमति दिएको सन्दीपका वकिल अधिवक्ता सरोजकृष्ण घिमिरेले जानकारी दिए । असोज २० गतेदेखि लागू हुने गरी हिरासतमा राख्न प्रहरीले अनुमति पाएको घिमिरेले बताए ।

यस्तै घिमिरेका अनुसार सन्दीपले अदालतसमक्ष युवती नाबालिका नरहेको पनि दावी गरेका छन् । ‘सन्दीपले विस्तृत रुपमा आफू निर्दोष रहेको कुरा भन्नुभएको छ । न्यायाधिस समक्ष घटनाक्रम सिलसिलाबद्ध रुपमा प्रस्तुत गर्दा के भएको हो भन्ने धारणा राख्नुभयो,’ घिमिरेले भने , ‘सन्दीप आफू कन्फीडेन्ट हुनुहुन्छ । निर्दोष रहेको बताउनुभएको छ । गोपनीयता भंग भएको बारे वैकल्पिक उपचारबारे पनि सोध्नुभएको छ । मुद्दाका क्रममा यसबारे छलफल गरिने भनिएको छ ।’

यस्तै घिमिरेले युवतीको दुई वटा जन्ममिति रहेको पनि बताए । ‘इजलासमा उमेरको कुरा पनि भएको छ । सन्दीपले आफूलाई युवतीले बारम्बार १९ वर्ष रहेको बताउनुभएको थियो । श्रीमान समक्ष भविष्यमा विशेष लाभ प्राप्त गर्न उमेर बढाएको भन्ने पनि रहेको छ,’ उनले जानकारी दिए ।

यस्तै कानुन व्यवसायी सुधा रिजालले सन्दीपलाई फसाउन खोजिएको बताइन् । ‘उहाँले दुई वटा जन्मदर्ता बनाएको देखिएको छ । सिलसिलाबद्ध रूपमा उहाँ (सन्दीप) लाई फसाउन खोजिएको देखिन्छ । हामीले प्रमाण भेटिसकेका छौं,’ उनले भनिन्, ‘ उहाँले उमेर घटाएर दोस्रो जन्मदर्ता प्रतिलिपि बनाउनुभएको छ त्यो प्रमाण पेस गर्छौं। उहाँ (सन्दीप) निर्दोष हुनुहुन्छ।’

भदौ २१ गते सन्दीपविरुद्ध बलात्कार आरोपको उजुरी परेको थियो । प्रहरीले पक्राउ पुर्जी जारी गरेको झन्डै एक महिनापछि गत बिहीबार नै त्रिभुवन अन्तर्राष्ट्रिय विमानस्थलबाट पक्राउ गरेको थियो । दशैं बिदाका कारण बन्द रहेको अदालत खुलेपछि आज उनलाई अदालतमा पेस गरिएको हो ।

अदालतबाट सन्दीप पक्षका कानुन व्यवसायीले यसो भने : https://www.youtube.com/embed/F0PTdktr2V8