ज्योतिको प्रतियोगिताकै उत्कृष्ट ब्याटिङमा एपिएफको विशाल योगफल

पोखरा (हाम्रो खेलकुद) – ओपनर ज्योति पाण्डेले प्रतियोगिताकै उत्कृष्ट ब्याटिङ गर्दा नेपाल एपिएफ क्लबले नवौं राष्ट्रिय खेलकुद अन्तर्गत महिला क्रिकेटको पहिलो सेमिफाइनलमा खेलमा लुम्बिनी प्रदेशलाई १ सय ३० रनको विशाल लक्ष्य दिएको छ ।

पोखरा रंगशालामा टस हाररेर पहिला ब्याटिङको निम्तो पाएको एपिएफले निर्धारित २० ओभरमा ३ विकेट गुमाउँदै १ सय २९ रन बनायो । एपिएफको लागि ज्योति पाण्डेले ६१ बलमा ७ चौकासहित सर्वाधिक ६९ रनमा अविजित छन् ।

यो प्रदर्शन यस प्रतियोगिताकै उच्च हो । यसअघि नेपाल पुलिस क्लबकी सम्झना खड्काले प्रदेश १ विरुद्ध ६० रनको इनिङ खेलिन् । एपिएफले चौथो ओभरमा कप्तान सीता रानामगरलाई ११ रनमा गुमाएका थियो । मध्य गतिकी बलर मनिषा रानाको बलमा सीता एज लागेर विकेटकिपर लक्ष्मी चौधरीबाट क्याच भइन् ।

इन्दु बर्मा ११ रनमा स्टम्पिङ आउट भइन् । ममता चौधरी २२ बल खेल्दै कृतिका मरासिनीको बलमा १६ रनमा बोल्ड हुन पुगिन् ।

रोमा थापा १३ बल खेल्दै १२ रनमा अविजित रहिन् । लुम्बिनी प्रदेशकी कृतिका मरासिनीले ४ ओभरमा २० रन खर्चेर २ विकेट लिइन् । मनिषा रानाले ४ ओभरमा २५ रन खर्चेर १ विकेट लिइन् ।

दोस्रो सेमिफाइनल खेलमा आज नेपाल पुलिस क्लब र बागमती प्रदेशबीच प्रतिस्पर्धा हुनेछ । फाइनल र तेस्रो स्थानको लागि मंगलबार प्रस्तिस्पर्धा हुनेछ ।