काठमाडौं (हाम्रो खेलकुद) – युवा तीव्र गतिका बलर गौतम केसीले प्रधानमन्त्री कप एकदिवसिय अन्तर्गत बागमती प्रदेश छनोटमा चितवनबाट टियु युनिभसिर्टीविरुद्ध विष्फोटक ब्याटिङ गर्दै २८ रनको जित दिलाएका छन् ।

मुलपानी क्रिकेट मैदानमा टस जितेर पहिला ब्याटिङ थालेको चितवन ३८.३ ओभरमा २ सय १५ रनमा अल आउट भयो । चितवनका गौतम केसीले ८३ बलमा ३ चौका र ७ छक्कासहित ८४ रनको उत्कृष्ट इनिङ खेले । प्रतिक श्रेष्ठले ६७ बलमा ५ चौका र २ छक्कासहित ६० रन बनाएका थिए । तल्लोक्रमका दीपेश श्रेष्ठले २२ रन बनाए ।

टियुको लागि रुपेश श्रीभात्सवले ८ ओभरमा २३ रन खर्चेर ४ विकेट लिए । धिरज कार्कीले तीन र श्याम त्रिपाठीले दुई विकेट लिए । जितको लागि २ सय १६ रनको विजयी लक्ष्य पछ्याएको टियु ३७ ओभरमा १ सय ८७ रनमा अल आउट भयो ।

टियुको लागि कप्तान पृथु बाँस्कोटाले ६३ बलमा ७ चौका र १ छक्कासहित ७३ रन बनाएपनि टोलीको हार टार्न सकेनन् । त्यस्तै रिङजिङ लामा ४३ र लक्की कठायत १८ रनमा आउट भए ।

चितवनको लागि स्पिनर कृजन गुरुङले ८ ओभरमा १ मेडनसहित २८ रन खर्चेर ५ विकेट लिए । गौतम केसीले एक डानिश इकबालले दुई दुई विकेट लिए ।

समूह ए मा ललितपुर, भक्तपुर, काठमाडौं र नुवाकोट थिए । ललितपुर शीर्ष स्थानमा रहँदै फाइनलमा पुग्यो । समूह बी मा चितवन, मकवानपुर र त्रिभुवन युनिभर्सिटी थिए । समूह बी बाट मकवानशीर्ष स्थानमा रहँदै फाइनलमा पुगेको छ । शुक्रबार फाइनलमा मकवानपुर र ललितपुरबीच प्रतिस्पर्धा हुनेछ ।