एजेन्सी – आइसिसी टि२० विश्वकपमा भारतले पाकिस्तानविरुद्ध टस जितेर पहिला फिल्डिङ गर्ने निर्णय लिएको छ । मेलबर्न क्रिकेट ग्राउन्डमा भारतका कप्तान रोहित शर्माले टस जितेर पहिला फिल्डिङ गर्ने निर्णय लिएका हुन् ।

भारतका रोहित शर्माले आजको खेलमा सात ब्याटर र दुई स्पिनर रहेको बताएका छन् । भारतको टोलीमा तीन तीव्र गतिका बलर छन् । पाकिस्तानका कप्तान बाबर आजमले तीन तीव्र गतिका बलर दुई स्पिनर रहेको बताएका छन् ।

भारतले प्रमुख स्पिनर युजभेन्द्र चहल र विकेटकिपर ऋषभ पन्तलाई बेन्चमा राखेको छ । त्यस्तै हर्षल पटेल र दीपक हुडालाई पनि बेन्चमा राखेको छ ।

विश्वकपका दुबै उपाधि दाबेदार टोली भारत र पाकिस्तान सानदार सुरुवात गर्न चाहन्छन् । भारतलाई गतवर्ष विश्वकपमा पाकिस्तानले १० विकेटले हराएको थियो । पाकिस्तान त्यसलाई निरन्तरता दिन चाहन्छ । भारत त्यसको बदला लिने सोचमा हुनेछ । यो खेलको विजेता सेमिफाइनल खेल्ने सम्भावना बलियो हुनेछ ।

गतवर्ष विश्वपपछि भारत र पाकिस्तान अघिल्लो महिना एसिया कपमा भिडेका थिए । एसिया कपमा भारत र पाकिस्तान एक एक पटक विजयी भएका थिए । भारत ब्याटिङ र पाकिस्तान बलिङको मुख्य हतियार हुन् ।

पाकिस्तानको प्लेइङ ११ :

बाबर आजम (कप्तान), शादब खान, आसिफ अली, हैदर अली, हरिस रौफ, इफ्तिखर अहमद, मोहम्मद नवाज, मोहम्मद रिजवान (विकेटकिपर), नसिम शाह, शाहिन शाह अफ्रिदी र शन मकसुद ।

भारतको प्लेइङ ११ :

रोहित शर्मा (कप्तान), लोकेश राहुल (उप(कप्तान), विराट कोहली, सूर्यकुमार यादव, दीनेश कार्तिक (विकेटकिपर), हार्दिक पान्ड्या, रविचन्द्रन आश्विन, अक्षर पटेल, भुवनेश्वर कुमार, मोहम्मद शामी, र अर्शदीप सिंह ।

हेड टु हेड :

भारत र पाकिस्तानबीच टि२० आईमा ११ खेल भएका छन् । जसमा भारतले ८ र पाकिस्तानले ३ खेल जितेका छन् । पछिल्ला पाँच खेलमा पाकिस्तान दुई र भारत तीन खेलमा विजयी भएका छन् ।

सुपर १२ को समूह १ – इंग्ल्यान्ड, न्युजिल्यान्ड, अष्ट्रेलिया, अफगानिस्तान, श्रीलंका र आयरल्यान्ड ।

सुपर १२ को समूह २ – भारत, पाकिस्तान, दक्षिण अफ्रिका, बंगलादेश, जिम्बावे र नेदरल्यान्ड्स ।