एजेन्सी – आइसीसी टि२० विश्वकप २०२२ अन्तर्गत सुपर १२ को खेलमा भारतले पाकिस्तानलाई ४ विकेटले पराजित गर्यो । भारतको जितमा वीरत कोहलीले सानदार ब्याटिङ गरेका थिए ।

जितका लागि १ सय ६० रनको लक्ष्य पछ्याएको भारतले जवाफी ब्याटिङमा निकै खराब सुरुवात गरेको थियो । कोहलीले हार्दिक पान्ड्यासँग शतकीय साझेदारी गर्दै भारतलाई खेलमा फर्काएका थिए । उनले ५३ बलमा नटआउट ८२ रनको योगदान दिए । उनले ६ चौका र ४ छक्का प्रहार गरेका थिए ।

कोहलीले सुरुवाती २० बलमा ११ रन मात्र जोड्न सकेका थिए । तर त्यसपछि ३३ बलमा ७१ रन जोड्दै उनले सानदार जित दिलाए । उनले १९ औं ओभरको अन्तिम बलमा हरिस रौफलाई लगातार दुई छक्का प्रहार गरेपछि भारतको खेलमा फर्कने सम्भावना बढेको थियो । त्यसपछि अन्तिम ओभरमा नो बलमा छक्का प्रहार गर्दै भारतलाई जिततर्फ लम्काएका थिए ।

खेलपछि बोल्दै कोहलीले एक समय आफूले खेल बिगारेको अनुभूति गरेको बताए । ‘म सँग कुनै शब्द नै छैन । विश्वास गर्न गाह्रो भइरहेको छ । हामीले यो खेल कसरी जित्यौं थाहा छैन । एक समय मैले आफैं खेल बिगारेको महसुस गरेको थिएँ । तर हार्दिकले मलाई अन्त्यसम्म बस्नुपर्छ भनिरहे,’ उनले सुनाए ।

‘हामीले हिसाब गरिरहेका थियौं । नवाजको एक ओभर बाँकी रहेको थाहा थियो । हरिस रौफविरुद्ध रन हान्न सकियो भने पाकिस्तान दबाबमा आउँछ भन्ने बुझेको थिएँ । रौफलाई लगातार छक्का हान्दा आफैं गयो । मैले ब्याट मात्र चलाएको थिएँ, आफैंलाई विश्वास गर्न गाह्रो भयो,’ उनले बताए ।

‘मैले आजसम्म मोहालीको इनिङ आफ्नो सर्वोत्कृष्ट बताउँदै आएको थिएँ, आज पनि निकै राम्रो भयो । दुवै इनिङ मेरो लागि विशेष छ,’ कोहलीले भने ।

आफू खराब लयमा रहँदा पनि समर्थकबाट पाएको साथका लागि खुसी व्यक्त गरे । ‘म लामो समय लयमा नहुँदा पनि समर्थकले सधैं हौसला दिनुभयो । धन्यवाद भन्न चाहन्छु,’ उनले टुंग्याए ।

यो पनि : कप्तान बाबरले भने – ‘कोहलीकै कारण हार्यौं’