काठमाडौं (हाम्रो खेलकुद) – काठमाडौंमा जारी प्रधानमन्त्री कप एकदिवसीय राष्ट्रिय प्रतियोगितामा मुलपानीको पिच राम्रो नभएपछि दोस्रो सेमिफाइनल खेल टियु क्रिकेट मैदानमा हुने भएको छ ।

प्रधानमन्त्री कपको तालिका अनुसार बिहीबार टियु र मुलपानी दुबैमा सेमिफाइनल हुने कार्यक्रम थियो । पहिलो सेमिफाइनल बिहीबार टियुमा समूह ए को विजेता नेपाल एपिएफ क्लब र समूह बी को उपविजेता मधेश प्रदेशबीच हुनेछ । उक्त खेल तालिका अनुसार नै सुरु हुनेछ ।

सोहि दिन दोस्रो सेमिफाइनल समूह बी को विजेता नेपाल पुलिस क्लब र त्रिभुवन आर्मी क्लबबीचको खेल मुलपानीमा हुनुपर्ने हो । तर उक्त खेल शुक्रबार टियु क्रिकेट मैदानमा हुने भएको छ । शुक्रबार विश्रामको दिन थियो । तर मुलपानीको पिच राम्रो नभएपछि टियुमा गर्ने भएको छ । फाइनल शनिबार टियु क्रिकेट मैदानमा हुनेछ ।

नेपाल क्रिकेट संघ (क्यान) का कार्यवाहक सचिव प्रशान्त विक्रम मल्लले मुलपानीको पिच अनुमान अनुसार नभएपछि टेक्निकल कमिटिले टियुमा गर्ने निर्णय गरेको जनाएका छन् ।

‘नयाँ पिच बनेपनि आशा गरे जस्तो हुन सकेन । उता सेमिफाइनल खेल्ने टोलीले यता खेल्छौं भनेर निवेदन दिएका रहेछन् । टेक्निकल कमिटीले सेमिफाइनल पुग्ने चार टोलीलाई राखेर हुन्छ भन्ने गराएर यता सारेको हुन्’, प्रशान्तले हाम्रो खेलकुदसँग भने । त्यसैमा थपे, ‘तालिका बनाउँदा पिच राम्रो खेल्ला भन्ने भयो । तर त्यसो हुन सकेन । टिममको आग्रहमा टेक्निकल कमिटीले यता सारेको हो ।’

क्यानले माथिल्लो मुलपानी मैदानमा रहेका पाँच पिचै नयाँ माटो राखेको थियो । ८ इन्च माटो नयाँ राखेपनि प्रदर्शन भने उस्तै रह्यो । पहिला जस्तै ब्याटिङ गर्न कठिन भएपछि यता सार्न पुगेको हो । मुलपानी मैदानको कारण लगातार आलोचना हुँदै आएको छ । मुलपानीमा ५० ओभरको खेलममा एक सय रन बनाउन पनि कठिन पर्दै आएको छ ।

प्रधानमन्त्री कपको विजेताले १० लाख र उपविजेता टोलीले ५ लाख पाउनेछन् । सेमिफाइनलबाट बाहिरिने टोलीले ५०-५० हजार पाउनेछन् । त्यस्तै प्रतियोगिता सर्वोत्कृष्ट खेलाडीले ५० हजार रुपैयाँ पाउने भएका छन् ।

प्रतियोगिता उत्कृष्ट ब्याटर र बलरले समान २० हजार पाउनेछन् । प्रतियोगिता उदीयमान खेलाडीले १० हजार प्राप्त गर्नेछन् । प्लेयर अफ द म्याचले ५ हजार पाउनेछन् । प्रतियोगिताको अनुमाति कुल बजेत १ करोड ५० लाख छ । राष्ट्रिय खेलकुद परिषद् (राखेप) ले ६० लाख र अन्य क्यानले आन्तरिक श्रोतबाट पूरा गर्नेछ ।

मुलपानी मैदानको पछिल्लो अवस्थाबारे यहाँ पढ्न सक्नुहुन्छ : उस्तै छ मुलपानीको पिच

अंक तालिका

समूह ए मा नेपाल एपिएफ क्लब ४ खेलमा ७ अंकका साथ शीर्ष स्थानमा रह्यो । आर्मी ३ खेलमा ६ अंकका साथ दोस्रो स्थानमा रह्यो । गण्डकी ४ खेलमा ५ अंकका साथ तेस्रो स्थानमा रहेर बाहिरियो । सुदूरपश्चिम ४ खेलमा २ अंकका साथ चौथो स्थानमा रह्यो । कर्णाली जित विहीन हुँदै बाहिरियो ।

समूह बी मा पुलिस ४ खेलमा ८ अंकका साथ शीर्ष स्थानमा रह्यो । मधेश ४ खेलमा ५ अंकका साथ पहिलो पटक सेमिफाइनलमा स्थान बनाउन सफल भयो । लुम्बिनी ४ खेलमा ४ अंकका साथ तेस्रो स्थानमा रहेर बाहिरियो । प्रदेश १ ले ४ खेलमा २ अंकका साथ चोथो स्थानमा रह्यो । बागमती पहिलो पटक जित विहीन हुँदै बाहिरियो ।