एजेन्सी – आइसिसी टि२० विश्वकप २०२२ को पहिलो सेमिफाइनलमा आज पाकिस्तान र न्युजिल्यान्डबीच प्रतिस्पर्धा हुँदैछ । खेल नेपाली समय अनुसार दिउँसो १ : ४५ मा सिड्नी क्रिकेट मैदानमा सुरु हुनेछ ।

पाकिस्तान तेस्रो र न्युजिल्यान्ड लगातार दोस्रो पटक फाइनलमा पुग्ने सोचमा हुनेछन् । न्युजिल्यान्ड सुपर १२ को समूह ए को विजेता र पाकिस्तान सुपर १२ को समूह बी को उपविजेताको रुपमा सेमिफाइनल खेलेका हुन् । दोस्रो सेमिफाइनलमा शुक्रबार भारत र इंग्ल्यान्डबीच प्रतिस्पर्धा हुनेछ । फाइनल आइतबार मेलबर्न क्रिकेट ग्राउन्डमा हुनेछ ।

न्युजिल्यान्डले सुपर १२ मा अष्ट्रेलियालाई ८९ रन, श्रीलंकालाई ६५ रन र आयरल्यान्डलाई ३५ रनले हराएको थियो । इंग्ल्यान्डसँग २० रनले पराजित हुँदा अफगानिस्तानसँग वर्षाको कारण अंक बाँडेको थियो ।

पाकिस्तान पहिलो खेलमा भारतसँग चार विकेटले पराजित भएको थियो । जिम्बावेसँग एक रनले स्तब्ध भएको पाकिस्तानले नेदरल्यान्ड्सलाई ६ विकेट, दक्षिण अफ्रिकालाई डकवर्थ लेविस पद्धतिको आधारमा ३३ रन र बंगलादेशलाई पाँच विकेटले हराउँदै सेमिफाइनलमा स्थान बनाएको थियो ।

अन्तिम खेलमा दक्षिण अफ्रिका नेदरल्यान्ड्ससँग पराजित भएपछि पाकिस्तान सेमिफाइनलमा पुगेको हो । पाकिस्तान यस विश्वकपको सबैभन्दा भाग्यशाली टोली हो । यता केन विलियम्सनको कप्तानीमा रहेको न्युजिल्यान्डले विश्वकपमा लगातार सानदार प्रदर्शन गर्दै आएको छ ।

पाकिस्तान २००९ को टि२० विश्वकप च्याम्पियन टोली हो । सन् २००७ को फाइनलमा भारतसँग पराजित भएको थियो । न्युजिल्यान्ड गत वर्ष पहिलो पटक फाइनलमा पुग्दै अष्ट्रेलियासँग ८ विकेटले पराजित भएको थियो ।

पाकिस्तान महत्त्वपूर्ण खेलमा कप्तान बाबर आजम र मोहम्मद रिजवानबाट उत्कृष्ट प्रदर्शन चाहन्छ । यी दुई ब्याटर पाकिस्तानका प्रमुख हतियार हुन् । यस विश्वकपमा भने दुवैले सोचेजस्तो प्रदर्शन गर्न सकेका छैनन् । यस विश्वकपमा बाबर आजम ३९ र मोहम्मद रिजवानले १ सय ३ रन बनाएका छन् । पाकिस्तानले पाएको यो अवसर बाबर र रिजवानका लागि पनि फलदायी सावित हुन सक्छ ।

मध्यक्रमका तीन ब्याटर मोहम्मद हरिस, इफ्तिखार अहमद र शान मसुदको प्रदर्शन महत्वपूर्ण हुनेछ । भारतविरुद्ध अर्धशतक हानेका इफ्तिखार र मसुदबाट मध्यक्रममा भरपर्दो ब्याटिङ चाहन्छ । इफ्तिखारले भारत र दक्षिण अफ्रिकाविरुद्ध सानदार ब्याटिङ गरेका थिए । उनको मनोबल उच्च हुनेछ ।

यता शादब खानले दक्षिण अफ्रिकाविरुद्ध २० बलमै अर्धशतक हानेका थिए । पाकिस्तान शादब र मोहम्मद नवाजबाट राम्रो अन्त्य चाहन्छ । पाकिस्तानको मध्यक्रम प्रमुख समस्या हो । तर यस विश्वकपमा मध्यक्रम भन्दा ओपनरको प्रदर्शन ठूलो चिन्ताको विषय बनेको छ ।

पाकिस्तानको तीव्र गतिको बलिङ आक्रामण उत्कृष्ट छ । शाहिन शाह अफ्रिदी, हरिस रौफ, नसिम शाह र मोहम्मद वासिम जुनियर छन् । अफ्रिदीले बंगलादेशविरुद्ध चार विकेट लिँदै लयमा फर्किएको संकेत दिएका छन् । उनबाट पाकिस्तान उत्कृष्ट प्रदर्शन चाहन्छ ।

रौफले डेथ ओभरमा लगातार उच्च प्रदर्शन गर्दै आएका छन् । नसिम शाह र जुनियरले पनि लगातार उच्च प्रदर्शन गर्दै आएका छन् । स्पिनरमा शादब खान र नवाज रहनेछन् । शादबले बलिङमा पनि सानदार प्रदर्शन गर्दै आएका छन् ।

अष्ट्रेलियालाई हराउन डेभन कन्वेले ५८ बलमा ९२ रन फिन एलेनले १६ बलमा ४२ रन जोडेका थिए । दोस्रो खेल वर्षाको कारण अफगानिस्तानसँग अंक बाँड्नु परेको थियो । श्रीलंकालाई ६५ रनले हराएको थियो ।

श्रीलंकाविरुद्ध जितमा ग्लेन फिलिप्सले ६४ बलमा १ सय ४ रनको शतकीय इनिङ खेलेका थिए । न्युजिल्यान्ड इंग्ल्यान्डसँग २० रनले पराजित भएको थियो । फिलिप्सले उक्त खेलमा ६२ रन जोडेका थिए । न्युजिल्यान्डले आयरल्यान्डलाई ३५ रनले हराएको थियो । उक्त खेलमा केन विलियम्सनले ३५ बलमा ६१ रन जोडेका थिए ।

विलियम्सन, फिलिप्स, कन्वे र एलेन प्रमुख ब्याटर हुन । फिलिप्स उच्च लयमा छन् । उनले ४ खेलमा १ सय ९५ रन बनाएका छन् । कन्वेले १ सय २४, विलियम्सनले १ सय ३२ र फिन एलेनले ९१ रन बनाएका छन् ।

चार ब्याटरको प्रदर्शनले न्युजिल्यान्डको ब्याटिङ योगफल निर्धारण हुने देखिन्छ । न्युजिल्यान्डको तल्लोक्रम कमजोरीको रुपमा छ । जेम्श निसम, डर्याल मिचेल र मिचेल सान्टनार रहनेछन् ।

गतवर्ष इंग्ल्यान्डलाई पाँच विकेटले हराउँदै फाइनलमा पुर्याउन डर्याल मिचेल हिरो बन्दै ४७ बलमा ७२ रनको अविजित इनिङ खेलेका थिए । न्युजिल्यान्ड मैदानमा सधैं उच्च प्रदर्शन गर्ने टोली हो । कागजी रुपमा खासै स्टार खेलाडी नभएपनि मैदानमा दमदार प्रदर्शन गर्ने गर्दछन् ।

न्युजिल्यान्डको बलिङ आक्रमण मजबुत छ । तीव्र गतिका बलर ट्रेन्ट बोल्ट, टिम साउथी र लोकी फर्गुसन हुनेछन् । यी तीन तीव्र गतिका बलरले लगातार उच्च प्रदर्शन गर्दै आएका छन् । स्पिनर मिचेल सान्टनार र ईश सोधी हुनेछन् ।

पाकिस्तानले १९९२ को एकदिवसिय विश्वकप उपाधि जित्दा सेमिफाइनलमा न्युजिल्यान्डलाई नै ४ विकेटले हराउँदै फाइनलमा स्थान बनाएको थियो । त्यो समय न्युजिल्यान्ड शीर्ष स्थानमा रहँदै सेमिफाइनल खेलेको थियो । आजको खेलमा दुबै टोलीमा परिवर्तनको भने सम्भावना कम छ ।

हेड टु हेड :

यी दुई देशबीच कुल २८ खेल हुँदा पाकिस्तान १७ र न्युजिल्यान्ड ११ खेलमा विजयी भएका छन् । पछिल्ला पाँच खेलमा पाकिस्तान चार खेलमा विजयी भएको छ ।