एजेन्सी – इंग्ल्यान्डका ओपनर एलेक्स हेल्सले भारतविरुद्ध जितमा उत्कृष्ट प्रदर्शन गरेपछि आफ्नो लागि विशेष इनिङ रहेको बताएका छन् ।

एडिलेडमा भारतविरुद्ध १० विकेटको जित हासील गर्ने क्रममा हेल्स र कप्तान जस बटलरले १ सय ७० रनको साझेदारी गरे । १६ ओभरमा खेल समाप्त गर्ने क्रममा हेल्सले ८६ र बटलरले ८० रन जोडे । हेल्सले ४७ बलको सामना गर्दै ४ चौका र ७ छक्का प्रहार गरेका थिए । उनले २८ बलमा नै अर्धशतक पूरा गरेका थिए ।

हेल्सले भारतविरुद्ध सेमिफाइनल भएकाले पनि इनिङ विशेष रहेको बताए । ‘पक्कैपनि यो मेरो करिअरको उत्कृष्ट इनिङमा पर्छ । आजको प्रदर्शनबाट निकै खुसी छु । विश्वकपको सेमिफाइनल, त्यो पनि भारत विरुद्ध । आजको दिन निकै विशेष छ,’ उनले सुनाए ।

अष्ट्रेलियाको बिग ब्यास लिगमा मेलबर्न रेनेगेड्सका लागि खेलेका हेल्सले यो मैदान आफ्नो लागि सहज हुने बताए । ‘यो विश्वको उत्कृष्ट मैदानमा पर्छ । व्यक्तिगत रुपमा पनि मलाई यहाँ खेलेकोले निकै मनपर्छ । यहाँ पावरप्लेमा ब्याटिङ गर्न मजा आउँछ । स्क्वायरमा छोटो बाउन्ड्री भएकाले खुलेर खेल्न सक्छु । मेरो लागि पनि यो मैदान विशेष रहेको छ,’ उनले भने ।

हेल्स पछिल्लो समय इंग्ल्यान्डको राष्ट्रिय टोलीबाट बाहिर थिए । तर विश्वकपअघि जोनी बेयरस्टो घाइते हुनु र जेसन रोय लयबाट बाहिर रहेपछि उनले अवसर पाएका थिए । बिग ब्यासको प्रदर्शन पनि उनको छनोटमा मुख्य कारण थियो ।

हेल्सले खेलपछि भने, ‘मैले सोचेको थिइनँ फेरी विश्वकप खेल्न पाउँछु भनेर । फेरी यो अवसर पाएकोमा खुसी थिएँ । अष्ट्रेलियामा आएर उपलब्धि हासिल गरेका छौं । आज जसले (बटलर) ले पनि उत्कृष्ट खेले ।’

यो पनि : भारतमाथि सानदार जितसँगै इंग्ल्यान्ड फाइनलमा