एजेन्सी – भारतीय क्रिकेट टोलीका युवा बायाँ हाते ओपनर ईशान किशनले बंगलादेशसँगको तेस्रो ओडिआई खेलमा विष्फोटक दोहोरो शतक प्रहार गरेका छन् ।

किशनले १ सय २६ बलमा २३ चौका र ९ छक्कासहित २ सय रन पूरा गरेका छन् । उनी ओडिआई इतिहासमा सर्वाधिक छिटो दोहोरो शतक हान्ने खेलाडी पनि बनेका छन् । उनले वेस्टइन्डिजका विष्फोटक ब्याटर क्रिस गेललाई पछि पार्दै दुर्लभ कीर्तिमान बनाएका हुन् ।

दोहोरो शतक सर्वाधिक छिटो क्रिस गेलले १ सय ३८ बलमा जिम्बावेविरुद्ध २०१५ मा प्रहार गरेका थिए । ईशान, रोहित शर्मा, सचिन्द तेन्दुलकर र विरेन्द्र सहवागपछि ओडिआईमा दोहोरो शतक प्रहार गर्ने चौथो भारतीय ब्याटर हुन् ।

ईशान किशनले सुरुवाती ४९ बलमा मात्रै ५० रन जोडेका थिए । पहिलो ५० रन पूरा गर्न उनले ७ चौका र १ छक्का प्रहार गरेका थिए । ५० रन पछि किशनले खेल्ने शैली परिवर्तन गरे ।

ईशान किशन ओडिआईमा दोहोरो शतक प्रहार गर्ने विश्वका सातौं खेलाडी हुन् । भारतका रोहित शर्माले ओडिआईमा सर्वाधिक तीन पटक दोहोरो शतक प्रहार गरेका छन् । रोहितले ओडिआई इतिहासकै सर्वाधिक २ सय ६४ रन श्रीलंकाविरुद्ध २०१४ मा प्रहार गरेका थिए ।

८५ बलमा १४ चौका र २ छक्का हान्दै करिअरको शतक पूरा गरेका थिए । किशनले १ सय ३ बलमा १६ चौका र ८ छक्कासहित १ सय ५० रन पूरा गरेका थिए । रोहित शर्मा, सचिन तेन्दुलकर, क्रिस गेल, मार्टिन गुप्टिल, विरेन्द्र सहवाग र फखार जमानले दोहोरो शतक प्रहार गरेका थिए ।

जहुर अहमद चौधरी स्टेडियममा टस हारेर पहिला ब्याटिङ थालेको भारतले ३६ ओभरमा २ विकेट गुमाउँदै ३ सय ६ रन बनाएको छ । ईशान किशन १ सय ३१ बलमा २४ चौका र १० छक्कासहित २ सय १० रनमा आउट भएका छन् ।