एजेन्सी – अनुभवी खेलाडी चेतेश्वर पुजारा र युवा ब्याटर श्रेयस ऐरको शतकीय साझेदारीमा भारत पहिलो टेस्ट खेलमा घरेलु टोली बंगलादेशविरुद्ध पूनरागमन गरेको छ । जहूर अहमेद चौधरी स्टेडियममा टस जितेर पहिला ब्याटिङ थालेको भारत पहिलो दिनको समाप्तिमा ९० ओभरमा ६ विकेट गुमाउँदै २ सय ७८ रन बनाएको छ ।

भारतका युवा ब्याटर श्रेयस ऐर १ सय ६९ बलमा १० चौकासहित ८२ रनमा अविजित छन् । करिअरको छैटौं टेस्ट खेल खेलि रहेका श्रेयस ऐरको लक्ष्य दोस्रो दिन शतकसँगै टोलीको विशाल योगफल हुनेछ ।

चेतेश्वर पुजारा दिनको अन्तिम समयतिर २ सय ३ बलमा ११ चौका प्रहार गर्दै ९० रनमा बोल्ड भए । पहिलो दिनको खेल सकिन ६ ओभर बाँकी हुँदा स्पिनर ताइजुल इस्लामको बलमा पुजारा बोल्ड हुन पुगेका थिए ।

विश्व टेस्ट च्याम्पियनसिपको फाइनल खेल्न महत्वपूर्ण मानिएको यस सिरिजको पहिलो खेलमा भारतको सुरुवात भने अपेक्षा अनुसार हुन सकेन । एक समय ११२–४ को अवस्थामा पुगेपनि पाँचौं विकेटका लागि ऐर र पुजाराले १ सय ४९ रनको साझेदारी गरेपछि भारत खेलमा फर्किएको थियो ।

ओपनर लोकेश राहुल र शुभमन गिलले पहिलो विकेटका लागि ४१ रनको साझेदारी गरेका थिए । यासिर अलिबाट ताइजुलले ओपनर गिललाई २० रनमा क्याच गराउँदै साझेदारी तोडेका थिए । कप्तान लोकेश राहुल ५४ बलमा ३ चौकासहित २२ रनमा आउट भए ।

प्रमुख ब्याटर विराट कोहली ताइजुलको बलमा एक रनमै एलबीडब्लू आउट भएका थिए । ऋषभ पन्त ४५ बलमा ६ चौका र २ छक्कासहित ४६ रनमा बोल्ड भए । दिनको अन्तिम बलमा मेहदी हसन मिराजले अक्षर पटेललाई १४ रनमा एलबीडब्लू आउट गरे । बंगलादेशका ताइजुल इस्लामले तीन, मेहिदी हसन मिराजले दुई र खालेद अहमदले एक विकेट लिएका छन् ।

अष्ट्रेलिया १२ खेलमा ८ मा जितसहित शीर्ष स्थानमा छ । दक्षिण अफ्रिका १० खेलमा ६ मा जितसहित दोस्रो स्थानमा छ । भारत १२ खेलमा ६ मा जितका साथ चौथो स्थानमा छ । ९ देश सहभागी विश्व टेस्ट च्याम्पियनसिपको फाइनलमा शीर्ष दुई टोली भिड्नेछन् ।