एजेन्सी – अष्ट्रेलियाको चर्चित बिग ब्यास लिगमा सिड्नी थन्डर एडिलेड स्ट्राइकर्ससँग १५ रनमै अल आउट हुँदै १ सय २४ रनको फराकिलो अन्तरले पराजित भएको छ । बिग ब्यास २०२२/२३ सिजनको पाँचौं खेलमा जितको लागि १ सय ४० रनको विजयी लक्ष्य पछ्याएको सिड्नी ५.५ ओभरमा १५ रनमा अल आउट भयो ।

यो टि२० क्रिकेट इतिहासकै सबैभन्दा कम योगफल हो । यसअघि टि२० क्रिकेटमा सबैभन्दा कम योगफल २०१९ मा टर्की चेक रिपब्लिकनविरुद्ध २१ रनमा अल आउट भएको थियो । एलेक्स हेल्स र राइली रोसोउ जस्ता ब्याटर टोलीमा रहेपनि सिड्नी १५ रनमै अल आउट भयो ।

बिग ब्यासमा यसअघि सबैभन्दा कम योगफल २०१५ मा मेलबर्न रेनेगड्स मेलबर्न स्टार्ससँग ५७ रनमा अल आउट भएको थियो । एडिलेडका तीव्र गतिका बलर हेनरी थोरन्टनले २.५ ओभरमा १ मेडनसहित ३ रन खर्चेर ५ विकेट लिए । वेस अगरले २ ओभरमा ६ रन खर्चेर ४ विकेट लिए ।

सिड्नीका पाँच खेलाडीले खाता खोल्न सकेनन् । दुबै ओपनर एलेक्स हेल्स र म्याथ्यु गिल्केस शून्यमा आउट भएका थिए । राइली रोसो ३, कप्तान जेसन संघा, एलेक्स रोस २, ड्यानिल साम्स र ओलिभर डेभिस एक एक रनमा आउट भएका थिए ।

टोलीका लागी सर्वाधिक रन १० औं नम्बरका ब्याटर ब्रेन्डन डगेटले एक चौका प्रहार गर्दै ४ रन जोडे । यो पुरुषतर्फ टि२० इतिहासकै कम योगफल हो । महिलातर्फ भने माल्दिभ्स र माली ६-६ रनमा अल आउट भएका छन् ।