एजेन्सी – इंग्ल्यान्डका सुपर स्टार अलराउन्डर बेन स्टोक्स इन्डियन प्रिमियर लिग (आइपिएल) २०२३ को मिनी अक्सनमा सर्वाधिक महँगो मूल्यमा विक्ने सम्भावना छ ।

मिनी अक्सन शुक्रबार कोचीमा हुनेछ । अक्सनमा कुल ४ सय ५ खेलाडी हुनेछन् । फ्रेन्चाइज टोलीमा बेन स्टोक्सको माग अत्याधिक भएपछि शुक्रबार उनीमाथि पैसाको वर्षा हुने सम्भावना देखिन्छ । स्टोक्सको नाम अक्सनमा १३ औं नम्बरमा छ । उनले आफ्नो न्यूनमत मूल्य २ करोड भारु राखेका छन् ।

दुई महिनअघि इंग्ल्यान्डलाई टि२० विश्वकप उपाधि जिताउन बेन स्टोक्सले सानदार प्रदर्शन गरेका थिए । फाइनलमा पाकिस्तानविरुद्ध स्टोक्सले ५२ रनको अविजित परिपक्क प्रदर्शन गर्दै उपाधि पक्का गराएका थिए । २०१९ को एकदिवसीय विश्वकप उपाधि जित्न बेन स्टोक्सले सानदार प्रदर्शन गरेका थिए ।

बायाँ हाते अलराउन्डर बेन स्टोक्सले अन्तर्राष्ट्रिय क्रिकेटमा तीनै शैलीमा उच्च प्रदर्शन गर्दै आएका छन् । ओडिआईबाट भने सन्न्यासको घोषणा गरि सकेका छन् । उनको कप्तानीमा इंग्ल्यान्डको टेस्ट टोलीले विष्फोटक ब्याटिङ गर्दै आएको छ । बेन स्टोक्स म्याच विनर अलराउन्डर र कप्तान हुँदा धेरै फ्रेन्चाइज टोली उनलाई भित्र्याउन खोज्नेछन् ।

बेन स्टोक्स सनराइजर्स हैदराबाद जाने उच्च सम्भावना छ । हैदराबादले यस सिजनको लागि कप्तान केन विलियम्सन र विकेटकिपर निकोलस पुरनलाई फुकुवा गरेको थियो । हैदराबादले विलियम्सन, पुरन, शेन एबोट र रोमारियो शेफर्डलाई फुकुवा गरेको थियो । हैदराबादलाई कप्तान आवश्यक हुँदा महँगो मूल्यमा हैदराबाद जाने सम्भावना उच्च देखिन्छ ।

अक्सनमा हैदराबादसँग सर्वाधिक धेरै ४२ करोड २५ लाख भारु छ । चार विदेशी खेलाडीको कोटा बाँकी छ । कुल १३ खेलाडी अक्सनमा किन्नसक्छ । अक्सनमा बेन स्टोक्सलाई हैदराबादसँगै मुम्बई इन्डियन्स, पन्जाब किंग्स, लखनउ सुपर जायन्ट्स, मुम्बई इन्डियन्स र चेन्नई सुपर किंग्सबीच कडा प्रतिस्पर्धा हुने सम्भावना देखिन्छ ।

हैदराबादसँग धेरै पैसा हुँदा त्यसको फाइदा उठाउँदै भित्र्याउन सक्छ । कप्तान आवश्यक हुँदा बेन स्टोक्सलाई नै किन्ने उच्च सम्भावना देखिन्छ । पन्जाबसँग अक्सनमा ३२ करोड भारु बाँकी छ । पन्जाबको नजर साम करनमाथि हुन सक्छ । साम करन डेथ ओभर स्पेलिष्ट अलराउन्डर हुँदा पन्जाब उनलाई अक्सनमा उनलाई भित्र्याउन सक्छ । साम करन नपाउँदा भने बेन स्टोक्स उसको रोजाईमा हुनेछ ।

उता चेन्नई पनि महेन्द्रसिंह धोनीपछिको स्थायी कप्तानको खोजीमा छ । गतवर्ष पहिलो पटक रविन्द्र जडेजालाई कप्तानी दिएपनि पछि पुन धोनीले गरेका थिए । धोनी आफ्नो करिअरको अन्तिम समयतिर छन् । त्यसैले बेन स्टोक्स राम्रो विकल्प हुन सक्छन् । चेन्नईसँग अक्सनमा २० करोड ४५ लाख भारु रकम छ ।

काइरन पोलार्डले सन्न्यास लिएपछि मुम्बई पनि बेन स्टोक्समा लगानी गर्ने देखिन्छ । गतवर्ष हार्दिक पान्ड्यालाई फुकुवा गरेपछि मुम्बई कमजोर देखिएको थियो । हार्दिक र पोलार्ड नभएपछि मुम्बई म्याच विनर स्टार अलराउन्डर चाहन्छ ।

लोकेश राहुल कप्तान रहेको लखउन बेन स्टोक्सलाई किन्न खोज्नेछ । लखनउसँग २३ करोड ३५ लाख भारु छ । अन्य टोली पनि भित्र्याउन खोज्ने देखिन्छ । अक्सनमा बेन स्टोक्स, साम करन र क्यामरन ग्रीन अलराउन्डरका सवैभन्दा राम्रा विकल्प हुन् । त्यसमा बेन स्टोक्स पहिलो रोजाईमा पर्नेछन् ।

आइपिइलमा बेन स्टोक्स

बेन स्टोक्सलाई २०१७ को अक्सनमा राइजिङ पुणे सुपर जायन्ट्सले १४ करोड ५० लाख भारुमा अनुबन्ध गरेको थियो । बेन स्टोक्सलाई २०१८ मा राजस्थान रोयल्सले १२ करोड ५० लाख भारुमा किनेको थियो । न्यूनतम मूल्य २ करोड राखेका स्टोक्सलाई किन्न त्यस अक्सनमा चेन्नई, पन्जाब, कोलकाता हुँदै राजस्थानले किनेको थियो ।

स्टोक्सले गतवर्ष आइपिएल खेलेनन् । बुबाको मृत्युपछि उनले अन्तर्राष्ट्रिय क्रिकेटबाट नै विश्राम लिएका थिए । त्यसैको कारण टि२० विश्वकप समेत खेलेका थिएनन् । बेन स्टोक्सले ४३ आइपिएल खेलमा २ शतकसहित कुल ९ सय २० रन बनाउनुको साथै २८ विकेट लिएका छन् ।

२०२० को आइपिएलमा राजस्थान रोयल्सले मुम्बईविरुद्ध १ सय ९६ रनको विजयी लक्ष्य पछ्याउनेक्रममा बेन स्टोक्सले १ सय ७ रनको सानदार शतकीय इनिङ खेलेका थिए । २०१७ मा पुणेबाट गुजरातविरुद्ध १ सय ३ रनको शतकीय इनिङ खेलेका थिए ।

आइपिएल इतिहासमा सर्वाधिक महँगो मूल्य २०२१ मा राजस्थान रोयल्सले १६ करोड २५ लाख रुपैयाँ खर्चेको थियो । जुन अक्सनमा कुनैपनि खेलाडीले प्राप्त गरेको सर्वाधिक बढी रकम हो ।

यो पनि : आइपिएल अक्सनमा पैसा वर्षा हुनसक्ने पाँच खेलाडी

आइपिएल अक्सनमा कमजोर बेंगलोर र कोलकाता