काठमाडौं (हाम्रो खेलकुद) – बागमती महिला क्रिकेट टोलीले पहिलो ४० ओभरको अभ्यास खेलमा हङकङ महिला क्रिकेट क्लबलाई दुई विकेटले हराएको छ । मुलपानी क्रिकेट मैदानमा टस हारेर पहिला ब्याटिङ थालेको २९.१ ओभरमा १ सय ७० रनमा अल आउट भयो ।

हङकङको टिममा राष्ट्रिय टिमकी कप्तान क्यारी चेनले २५ बलमा ४ चौका र १ छक्कासहित ३१ रनमा आउट भइन् । लेमोन चेरीले २८ बलमा ३१ रन बनाइन् । तम्मी चुले २५ बलमा ३ चौकासहित २५ रनमा आउट भइन् ।

बागमतीकी सोनी पाख्रिनले ५.१ ओभरमा ३० रन खर्चेर ४ विकेट लिए । खुशी डेंगोलले ८ ओभरमा ४७ रन खर्चेर २ विकेट लिइन् । विपिशा शाहीले ४ ओभरमा २६ रन खर्चेर २ विकेट लिइन् । कृष्मा गुरुङ र अश्मिना कर्माचार्यले एक एक विकेट लिइन् ।

जितको लागि १ सय ७१ रनको विजयी लक्ष्य पछ्याएको बागमतीले ३९ ओभरमा ८ विकेट गुमाउँदै पूरा गर्यो । बागमतीका अस्मिता खरेलले ५६ बलमा ७ चौकासहित ४२ रन बनाइन् ।

कन्चन श्रेष्ठ ९, सोनी पाख्रिन १८, हेलिसा गुरुङ १२, अश्मिना कर्माचार्य १३, विन्दा कटवालले शून्य, करिष्मा गुरुङ १३ र मनिशा मजाकोटी ४ रनमा आउट भइन् । सलिना सिलवाल ४७ बलमा २ चौकासहित २० र खुशी डंगोलले ५ रन बनाइन् । हङकङी बेट्टी चेनले सर्वाधिक दुई विकेट लिइन् ।

प्रदेश खेलकुद विकास परिषद्, बागमती प्रदेश, पल्सर क्रिकेट एक्सिलेन्स सेन्टर र बागमती प्रदेश क्रिकेट संघको संयुक्त आयोजनामा बागमती प्रदेश आमन्त्रण क्रिकेट श्रृंखला खेलेको हो ।

श्रृंखलामा नवौं राष्ट्रिय खेलकुदमा सहभागी बागमती प्रदेशको महिला टोली र हङकङ क्रिकेटको महिला टिमबीच दुई फम्र्याटको ४ मैत्रीपूर्ण खेल खेलाइने छ । दुई खेल ४० ओभरको हुनेछ भने बाँकी २ खेल टी– २० हुने छ ।

४० ओभरको दोस्रो खेल सोमबार हुनेछ । डिसेम्बर २७ र २९ तारिखमा टी– २० खेल हुनेछ । बागमती प्रदेशको महिला टिमले नवौं राष्ट्रिय खेलकुदमा कांस्य पदक जितेको थियो ।हङकङको टिममा राष्ट्रिय टिमकी कप्तान क्यारी चेनसहित राष्ट्रिय टिमको प्रतिनिधित्व गरिसकेका अन्य ६ खेलाडी छन् ।