काठमाडौं (हाम्रो खेलकुद) – शीर्षक्रमका ब्याटर एलेक्स ब्लेक र तल्लोक्रमका आजमतुल्लाह ओमरजाईको सानदार ब्याटिङमा काठमाडौं नाइट्सले नेपाल टि२० लिगमा जनकपुर रोयल्सलाई २ सय ९ रनको विशाल लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ थालेको काठमाडौंले निर्धारित २० ओभरमा ६ विकेट गुमाउँदै २ सय ८ रन बनायो । काठमाडौंका एलेक्स ब्लेकले ४३ बलमा ४ चौका र ७ छक्कासहित सर्वाधिक सर्वाधिक ८३ रन बनाए ।

ब्लेक जितेन्द्र मुखियाको अन्तिम ओभरको दोस्रो बलमा लङअफमा सन्दीप जोराबाट क्याच आउट भए । ओपनर विरनदीप सिंह ३४ बलमा ७ चौका र १ छक्कासहित ४९ रनमा आउट भए ।

विरनदीप सिंह स्पिनर पवन सरार्फको बलमा एलबीडब्लू आउट भएपछि अर्धशतक बनाउन मात्रै एक रनले चुकेका थिए । लोकेश बम ८ बलमा २ चौका र १ छक्कासहित १५ रनमा बोल्ड भए । लोकेश सराफुद्दिन अशरफको बलमा बोल्ड भएका थिए ।
पवन सरार्फले नै रयान बर्लको स्थानमा एलबीडब्लू आउट गरे ।

मोहम्मद आदिलको बलमा ज्ञानेन्द्र मल्ल कभरमा टे«भन ग्रिफिकबाट दुई रनमा उत्कृष्ट क्याच आउट भए । दोस्रो विकेटका लागि विरनदीप र ब्लेकले ६२ रनको साझेदारी गरे ।

तल्लोक्रमका आजमतुल्लाह ओमरजाई १५ बलमा १ चौका र ४ छक्कासहित ४३ रनमा अविजित रहे । नेपाल टि२० लिगमा २ सय माथि रन बनाउने पहिलो टोली काठमाडौं बनेको छ ।

जनकपुरका पवन सरार्फले ४ ओभरमा १८ रन खर्चेर २ विकेट लिए । सोमपाल कामी, जितेन्द्र मुखिया, सराफुद्धिन अशरफ र मोहम्मद आदिल आलमले एक एक विकेट लिए ।