काठमाडौं (हाम्रो खेलकुद) – सन्दीप जोरा र चाडविक वाल्टनको उत्कृष्ट ब्याटिङमा जनकपुर रोयल्सले नेपाल टि२० लिगमा फार वेस्ट युनाइटेडलाई ८ विकेटले हराएको छ । योसँगै जनकपुर तेस्रो जितका साथ अंक तालिकामा दोस्रो स्थानमा उक्लिएको छ ।

जितको लागि १ सय ७० रनको विजयी लक्ष्य पछ्याएको जनकपुरले १८.२ ओभरमा २ विकेट गुमाउँदै पूरा गर्यो । सन्दीप जोरा ५४ बलमा ३ चौका र ५ छक्कासहित ७७ रनमा अविजित रहे । सन्दीप जोराले करण केसीलाई विजयी छक्का हान्दै खेल सकाए ।

चाडविक वाल्टन ४० बलमा २ चौका र ५ छक्कासहित ६९ रनमा अविजित रहे । तेस्रो विकेटका लागि सन्दीप जोरी र चाडविक वाल्टनले १ सय ५१ रनको सानदार अविजित शतकीय साझेदारी गर्दै सहज जित दिलाए । जारी प्रतियोगितामा १ सय ५० माथि पहिलो पटक साझेदारी भएको हो । यसअघि पोखराका उपुल थरंगा र कुशल मल्लले छैटौं विकेटका लागि काठमाडौं नाइट्सविरुद्ध १ सय १४ रनको शतकीय साझेदारी गरेका थिए ।

अन्य कुनैपनि शतकीय साझेदारी हुन सकेको छैन । करण केसीले पवन सरार्फलाई १२ रनमा बोल्ड गरे । फार वेस्ट युनाइटेडका करण केसीले ३.५ ओभरमा २५ रन खर्चेर २ विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको फार वेस्टले निर्धारित २० ओभरमा ६ विकेट गुमाउँदै १ सय ६९ रन बनायो । करणले विष्फोटक ब्याटिङ गर्नेक्रममा अन्तिम ओभरमा जितेन्द्र मुखियालाई लगातार तीन छक्कासहित कुल २६ रन जोडे ।

करण केसी १७ बलमा ३ चौका र ४ छक्कासहित ४६ रनमा अविजित रहे । करणले पहिलो खेलमा लङअन, दोस्रो बल लङअफ र तेस्रो बल लङअनमा गरि जितेन्द्र मुखियालाई लगातार तीन छक्का हाने ।

चौथो बल लङअफमा कप्तान ट्रेभन ग्रिफिकले फिल्डिङ मिस गर्दा चौका भएको थियो । त्यसपछिका दुई बलमा भने दुई दुई रन बटुले । भीम सार्की ३० बलमा १ चौका र २ छक्कासहित ३६ रनमा अविजित रहे । ओपनर हासिम अन्सारी तीव्र गतिका बलर सोमपाल कामीको बलमा विकेटकिपर चाडविक वाल्टनबाट ११ रनमा क्याच आउट भए । उनले ७ बलमा २ चौका हाने । देव खनाल २६ बलमा २ चौका र १ छक्कासहित २२ रनमा क्याच आउट भए ।

कप्तान हस्मातुल्लाह शाहिदी १८ बलमा १ चौका र १ छक्कासहित १९ रनमा रन आउट भए । ललित नारायण राजवंशीले विनोद भण्डारीलाई १२ रनमा बोल्ड गरे । उमेर अली ललितकै बलमा शून्यमा क्याच आउट भए । जनकपुरका ललित नारायण राजवंशीले ४ ओभरमा २५ रन खर्चेर २ विकेट लिए । सोमपाल कामी र जितेन्द्र मुखियाले एक एक विकेट लिए ।

लुम्बिनी ४ खेलमा ८ अंकका साथ शीर्ष स्थानमा छ । जनकपुर ४ खेलमा ३ मा जित र १ मा हारसहित ६ अंकका साथ दोस्रो स्थानमा छ । जनकपुरले अव शनिबार विराटनगर सुपर किंग्ससँग खेल्नेछ । फार वेस्ट युनाइटेडले शुक्रबार पोखरासँग खेल्नेछ ।